जनकपुरधाम, चैत ३ गते । राष्ट्रपति रामचन्द्र पौडेलले गणतन्त्रको वास्तविक अर्थ बुझ्न र त्यसलाई अनुभुति गर्न बांकी नै रहेको जस्तो मलाई लागेको बताएका छन् ।
राष्ट्रपति पौडेलले शनिबार मटिहानीमा सहिद केशव कोइरालाको प्रतिमाको अनावरण गरेपछि मटिहानी नगरपालिकाद्वारा आयोजित कार्यक्रममा बोल्दै उनले यस्तो बताए ।
उनले भने “गणतन्त्र भनेको शासनमा व्यक्तिको परिवर्तन मात्र होइन यो त जनताको राजकीय शक्तिको प्रवाहमा सामेल हुन पाउने अधिकार हो यो त संस्कार, संस्कृति, आनीबानी र व्यवहारमात्रै होइन आचरणमा परिवर्तन पनि हो भनेर हामीले बुझ्न बाँकी छ ।”
राष्ट्रपति पौडेलले दलित, उत्पीडित, जनजाति, महिला, आदिवासीलगायत सबैभन्दा तल्लो तहका जनताको उत्थान नै लोकतन्त्र, गणतन्त्र र समानता भएको बताए । उनले भने, “हामीले जनताका अधिकार स्थापित गरेको संविधान पाएका छौँ । यसअनुसार दलित, उत्पीडित, जनजाति, महिला, आदिवासीलगायत सबैभन्दा तल्लो तहका जनताको उत्थान गर्नु छ । यही नै हो लोकतन्त्र, यही नै हो गणतन्त्र, यही नै हो समानता ।’’
राष्ट्रपति पौडेलले नागरिक अधिकार स्थापनाका लागि उनीहरूको मौलिक हक, अधिकारका लागि सङ्घर्षका गर्ने क्रान्तिको कोरिडोर हो, मटिहानीदेखि सिन्धुली, ओखलढुङ्गाहुँदै सगरमाथाको भूमि भएको बताउंदै मधेशलाई प्रजातन्त्रको भूमिको रूपमा सम्मान गरे । उनले संविधानमा अधिकारका विभिन्न प्रकार उल्लेख गरे पनि ती सबै अधिकारले निमुखा जनतालाई निर्बाध स्वतन्त्रता उपभोग गर्ने र उनीहरूको जीवनस्तर उकास्ने अवसर प्रदान गर्ने विषय नै सङ्घीय लोकतान्त्रिक गणतन्त्रले बोकेको दर्शनभित्रको अन्तर्य भएको स्पष्ट पारे ।
राष्ट्रपति पौडेलले हामीले प्रशासनिक रूपमा राज्यको पुनः संरचना ग¥यौ र तल्लोभन्दा तल्लो तहमा रहेका जनताको पहुँचमा राज्यसत्ता पुगेको छ भन्दै तर, राज्यको चरित्रको भने पुनः संरचना हुन र हामीले केन्द्रित गरेर राखेको अधिकार तल्लो तहमा प्रत्यायोजन गर्न अझै बाँकी रहेको धारणा व्यक्त गरे ।
उनले थप्दै भने “अब यसका लागि हामीले विलम्ब गर्न हुन्न भन्ने मलाई लाग्छ, संविधान बमोजिम प्रदेशहरूलाई अधिकार सम्पन्न बनाउने कानुन छिटो निर्माण गर्न सङ्घीय संसदमा प्रतिनिधित्व गर्ने राजनीतिक दलका नेताहरूलाई आग्रह गरेको म यहाँहरूसमक्ष स्मरण गर्न चाहन्छु ।”
शहीद केशव कोइरालाप्रति उनले “ओखलढुङ्गाको पूर्वी गाउँ छहरे कोइराला गाउँमा जन्मेर प्रचुर धन सम्पत्ति, नाता कुटुम्ब सबैलाई बिर्सिएर प्रजातान्त्रिक आन्दोलनको मूलधारमा सहभागी हुनु भएका केशव कोइराला कुशल सङ्गठनकर्ता तथा लोकप्रिय नेता हुनुहुन्थ्यो, ओखलढुङ्गामा जन्मेर राजविराज झरेर केशव लगायतले मधेशमा प्रजातन्त्रको पक्षमा चलाएको जागरण अभियानका कारण आज पनि मधेश प्रजातन्त्रका पक्षमा सतिसाल झैँ उभिरहेको छ भन्ने मलाई लाग्दछ”, राष्ट्रपति पौडेलले भने ।
कार्यक्रममा यसअघि उनले प्रजातान्त्रिक योद्धा गणेश नेपालीको सालिक अनावरण गर्दै राष्ट्रपति पौडेलले सुशासन, विकास, उत्पादन र रोजगारी बढाएर सङ्घीय लोकतान्त्रिक गणतन्त्रलाई साकार पार्ने अभियानमा सबै एकजुट भएर लाग्न आह्वान गरे । यसका साथै जनता आफैँले बनाएको नेपालको संविधान कार्यान्वयन गरेर आज हामीले नेपाली जनताले चाहेको सुशासन, विकास, उत्पादन र रोजगारीमार्फत समृद्धिको यात्रामा अघि बढ्ने राष्ट्रिय दायित्व पूरा गर्न लागि पर्नुपर्ने छ भन्ने हेक्का हामी सबैले राख्न जरुरी रहेको कुरामा जोड दिए ।
यसअघि राष्ट्रपति पौडेलले मटिहानीस्थित लक्ष्मीनारायण मन्दिर र जलेश्वरनाथ मन्दिरमा पूजाआजा गर्नुका साथै पिपरा स्थित लोकतान्त्रिक योद्धा स्वर्गीय रामनारायण मिश्रको सालिक र जलेश्वर नगरपालिका–५ मा निर्मित पूर्वमन्त्री स्वर्गीय गणेश नेपालीको सालिक अनावरण गरेका थिए ।
यो विषयमा आफ्नो प्रतिक्रिया दिनुहोस् !