जनकपुरधाम, २३ फागुन । १२ वर्षअघि अर्थमन्त्रीमा असफल भइसकेको माओवादी केन्द्रका वर्षमान पुनलाई नयाँ गठबन्धनको सरकारमा पुनः अर्थमन्त्रीकै बागडोर दिइएको छ ।
माओवादी केन्द्रका उपमहासचिव समेत रहेका पुन प्रधानमन्त्री पुष्पकमल दाहाल ‘प्रचण्ड’को सिफारिशमा राष्ट्रपति रामचन्द्र पौडेलबाट शपथग्रहण गरेका छन् । अर्थ मन्त्रालयमा पुनको यो दोस्रो आगमन हो । २०६८ सालमा डा. बाबुराम भट्टराई सरकारमा पुन १८ महिना अर्थमन्त्री बनेका थिए । अर्थमन्त्री बने पनि उनले आफ्नो कार्यकालमा बजेट ल्याउन पाएका थिएनन् ।
संवैधानिक जटिलताका कारण बाबुराम सरकारले नयाँ बजेट ल्याउन नपाई पुरानो बजेट कार्यान्वयन गरेको थियो । पुन अर्थमन्त्री रहेको समयमा सरकारले २१ वटा महत्त्वाकांक्षी परियोजनालाई राष्ट्रिय गौरवका आयोजना नामकरण गरेको थियो । तर आजसम्म ती परियोजनाहरु पुरा हुन सकेको छैन ।
प्रतिनिधि सभा विघटनअघि नेकपा एमालेका अध्यक्ष केपी ओली नेतृत्वको सरकारमा पुन ऊर्जा, जलस्रोत तथा सिँचाइ मन्त्री थिए । त्यसमा पनि उनले खासै काम गर्न नसक्दा आलोचनाको शिकार बनेका थिए । असफल नेतालाई अर्थमन्त्रीको जिम्मेवारी दिनुले देशको अर्थतन्त्र थप संकटमा फंस्न सक्ने आलोचना शुरु हुन थालेको छ ।
नयाँ गठबन्धन बन्न महत्वपूर्ण भूमिका निर्वाह गरेका पुन प्रचण्डका विश्वासपात्र हुन् । नयाँ गठबन्धन जुडाउन खलेको भूमिकाको सरप्राइज स्वरुप पार्टी अध्यक्ष प्रचण्डले उनलाई अर्थमन्त्रालय दिएको भन्ने टिकाटिप्पणी राजनीतिवृतमा भइरहेको छ । पहिलो संविधानसभामा ललितपुर– १ बाट चुनाव जितेका पुन प्रतिनिधि सभाका पछिल्ला दुई निर्वाचनमा रोल्पाबाट निर्वाचित हुँदै आएका छन् ।
यो विषयमा आफ्नो प्रतिक्रिया दिनुहोस् !