जनकपुरधाम, फागुन १० गते । प्रथम लालबन्दी महोत्सव बिहीवारदेखि शूरु भएको छ । “कृषि, पर्यटन र व्यापार स्वरोजगार : आत्मनिर्भरताको आधार“ भन्ने मूल नाराका साथ लालबन्दी ६ स्थित राधाकृष्ण फुटबल मैदानमा शुरू भएकाे हाे ।
उद्योग वाणिज्य संघ लालबन्दीद्वारा आयाेजित सो महोत्सवको मधेश प्रदेश सरकारकी उद्योग, वाणिज्य तथा पर्यटनमन्त्री सुनिता यादवले उद्घाटन गरेकी छिन् ।
उद्योग वाणिज्य संघ लालबन्दीका अध्यक्ष दिपेन्द्र बलम्पाकीको अध्यक्षतामा उद्घाटन गरिएको समारोहमा प्रदेश सभा सदस्य बेची लुंगेली, लालबन्दी नगर प्रमुख बासुदेव अधिकारी, उपप्रमुख कल्पना पाख्रिन, वडाध्यक्षहरु, प्रमुख जिल्ला अधिकारी कोमल प्रसाद धमला, नेपाली सेना भैरवी दल गण पाँचकुमारीका गणपति सुर्य बहादुर कार्की, नेपाल प्रहरीका एसपी दयानिधी ज्ञवाली, सशस्त्र प्रहरी उपरीक्षक विनोद राज खनालसहित विभिन्न राजनैतिक दलका नेताहरुकाे उपस्थिति रहेको थियो ।
उद्घाटन समारोहमा स्वागत नृत्य, कौडा नृत्य, लाखे, थारु नृत्य, तामाङ सेलो, मगर नृत्य, नेवारी लगायत विभिन्न भाषाभाषीका नृत्य सहित कार्यक्रमहरू प्रस्तुत गरिएको छ । त्यस्तै डोरीतान प्रतियागिता, क्युकोशिन कराँते, आईटीएफ कराँते लगायत विभिन्न खेलका कलाकौशल समेत प्रदर्शन हुने कार्यक्रम संचालक मनोज बख्रेलले जानकारी दिए ।
उद्योग वाणिज्य संघ लालबन्दीका अध्यक्ष बलम्पाकीले अस्ताइरहेको र कठीन अवस्थाबाट गुज्रिरहेको बजारलाई चलायमान बनाउने मुख्य उद्देश्य राखी महोत्सव आयोजना गरिएको बताएका छन् । फागुन १९ गतेसम्म आयोजना हुने महोत्सवको ५० हजार दर्शक अवलोकन गर्ने अपेक्षा गरिएको छ ।
महोत्सवको मुख्य आकर्षण शुक्रबारदेखि राष्ट्रिय स्तरका कलाकारहरुको प्रस्तुति रहनेछ भने महोत्सव अवलोकन गर्न ७० रुपैया शुल्क निर्धारण गरिएको छ भने विद्यार्थीलाई २० रुपैया छुट गरी ५० रुपियाँ र अशक्त र ज्येष्ठ नागरिकलाई भने निःशुल्क प्रवेश रहेको आयोजक पक्षले जानकारी दिएका छन् ।
यो विषयमा आफ्नो प्रतिक्रिया दिनुहोस् !