जनकपुरधाम, फागुन २ गते । नगरमा गुणस्तरीय उच्च शिक्षाका लागि धनुषाको ढल्केवरमा महेन्द्र बहमुखी क्याम्पसको भवन शिलान्यास गरिएको छ ।
बुधबार मिथिला नगरपालिकाका नगरप्रमुख महेन्द्र महतो र उपप्रमुख सुनितासिंह बुढाथोकीले एक कार्यक्रमबिच क्याम्पस भवनको शिलान्यास गरेकाे हो ।
भवन शिलान्यास गर्दै नगरप्रमुख महतोले क्याम्पस निर्माण पश्चात यस भेगका विद्यार्थीलाई उच्च शिक्षा हासिल गर्न बाहिर जानुपर्ने बाध्यता हट्ने बताए । उनले प्रस्तावित योजना अनुसार बिएड, बिडिएस, बिबिएस, सिटिइभिटीअन्तर्गत तीन वर्षे सिभिल ओभरसियर र सर्भेयर (अमिन) को पढाइ हुने जानकारी दिए ।
नगरप्रमुख महतोले क्याम्पस भवन निर्माण गर्ने १५ करोड रुपियाँभन्दा बढी खर्च अनुमान गरिएको बताउँदै सबै खर्च नगरपालिकाको आफ्नै बजेटबाट हुने बताए । “भवन निर्माणका लागि चालू आर्थिक वर्षमा साढे चार करोड रुपियाँ साधारण सभाबाट छुट्टयाएका थियौँ । जसमध्ये टेन्डरमार्फत एमएस जेभी निर्माण कम्पनीले अढाइ करोड रुपियाँमा ब्लक बिअन्तर्गतको पहिलो तलाको ठेक्का पाएको छ”, उनले भने ।
क्याम्पस निर्माण तथा सञ्चालनका लागि आवश्यक सबै कानुनी प्रक्रिया पुरा भएको बताउँदै नगर प्रमुख महतोले भवन निर्माण भए लगतै क्याम्पस सञ्चालन गरिने बताए ।
यो विषयमा आफ्नो प्रतिक्रिया दिनुहोस् !