जनकपुरधाम, माघ २४ गते । मधेश स्वास्थ्य विज्ञान प्रतिष्ठानले आफ्नो तेश्रो वार्षिकोत्सव खेल सप्ताहको रुपमा मनाउदैछ । ‘स्वस्थ्य जीवनको लागि खेल’ भन्ने मूल नाराका साथ मंगलवारदेखि पहिलो पटक खेल प्रतियोगिताको रुपमा सात दिने कार्यक्रम आयोजना गरी वार्षिकोत्सव मनाइरहेको छ ।
खेल प्रतियोगिता साप्ताहिक कार्यक्रम अन्तर्गत भलिबल, एथलटिक्स, ब्याडमिन्टन, क्रिकेट, क्यारमबोर्ड, कब्बडी, जमलास्टिक लगायतका खेल प्रतियोगिता संचालन हुने प्रतिष्ठानका रजिष्ट्रार डाक्टर विनोद यादवले जानकारी दिएका छन् ।
उक्त खेल प्रतियोगिता अन्तर्गत बुधवार पुरुष र महिलातर्फको भलिबल प्रतियोगिता सम्पन्न भएको छ । प्रतिष्ठानका कर्मचारी, प्रतिष्ठान अन्तर्गतका अस्पतालका डाक्टर, कर्मचारी, प्रतिष्ठानद्वारा संचालित शैक्षिक प्रतिष्ठानको विद्यार्थी शिक्षकहरुको सहभागितामा सो खेल प्रतियोगिता जारी रहेको जनाइएको छ ।
वार्षिकोत्सवको अन्तिम फागुन ५ मंचीय मूल कार्यक्रम आयोजना गरिनेछ । सो कार्यक्रममै खेल प्रतियोगितामा विजयी खेलाडी तथा टीमलाई शिल्ड, ट्रफी र सम्मानपत्र सहित सम्मानित गरिने उनले बताए । रजिष्ट्रार यादवले छोटो समयमै मधेश स्वास्थ्य विज्ञान प्रतिष्ठानले विभिन्न काम गरेर निकै उपलब्धी हासिल गरेको दाबी गरे । उनले भने तीन वर्षको अवधिमा देशका कुनैपनि स्वास्थ्य विज्ञान प्रतिष्ठान यति काम गर्न सकेको छैन जति मधेश स्वास्थ्य विज्ञापन प्रतिष्ठानले गरेको हो ।
सिमित श्रोत साधनमा प्रतिष्ठानले स्थापनाकालदेखि हालसम्म तीन वर्षको अवधिमा ल्याब, नर्सिँग र पब्लिक हेल्थ लगायतका चारवटा स्नातक तहको शैक्षिक प्रोग्राम संचालनमा ल्याएको र गएको वर्षदेखि एमडीको अध्यापन समेत शुरु गराउनुका साथै प्रादेशिक अस्पतालको अवस्थामा समेत सुधार आएको दाबी उनले गरे । प्रादेशिक अस्पतालमा क्याथल्याब संचालनमा ल्याइएको आइसीयू १२ वटासम्म बेड संचालनमा ल्याइएको र सिटी स्क्यान लगायतका व्यवस्था समेत गरिएको यादवले भने ।
यो विषयमा आफ्नो प्रतिक्रिया दिनुहोस् !