जनकपुरधाम, माघ ३ गते । जनमत पार्टीबाट मधेश प्रदेशका लागि राष्ट्रिय सभा निर्वाचनका सदस्यका उम्मेदवार रामाशंकर महासेठले गठबन्धन दल मधेशीहरुको जनभावना अनुरुप उम्मेदवार खडा गरेको कारण आफूले उम्मेदवारी दिएको बताएका छन् ।
बुधवार जनकपुरधामस्थित जनमत पार्टीका केन्द्रिय सचिवालयमा एक पत्रकार सम्मेलन आयोजना गरी उम्मेदवार महासेठले गठबन्धन विरुद्ध होइन गठबन्धनले मधेशीसँग गरेको विभेदको विरुद्धमा आफू राष्ट्रिय सभा सदस्यमा उम्मेदवारी दिएको बताए ।
उनले भने आफ्नो जित्न नसक्ने भन्ने कुरालाई नाकार्न सकिदैन । पहिचानका लागि भएको मधेश आन्दोलन र शहीदको भावना विपरित पटक पटक अवसर पाउंदै आएका पहाडी मूलका व्यक्तिलाई उम्मेदवार बनाएको परिपाटी विरुद्ध मधेशी जनताका लागि आफ्नो उम्मेदवारी रहेको छ ।
उम्मेदवार महासेठले आफ्नो उम्मेदवारीले आउंदो दिनमा कुनैपनि दलले मधेशी जनताको भाग खोस्न पाउंदैन भन्ने नयाँ बाटो निर्माण हुनेछ दाबी गरे । उनले भने कांग्रेसमा यतिका मधेशी नेता हुँदा हुँदा ४० वर्षदेखि पटक पटक अवसर पाइरहेका आनन्द ढुँगानालाई उम्मेदवार बनाएर मधेशी जनतासँग गरेको बेइमानीलाई नयाँ पाठ सिकाउन आफूले उम्मेदवारी दिएको हो । आगामी दिनमा कुनैपनि दलले मधेशी जनतालाई अवसरबाट वञ्चित गर्न पाउंदैनन् ।
मधेशवादी दलप्रति आक्रोश पोख्दै महासेठले भने सयौं मधेशी जनताको रगतमा सत्तामा पुगेका कथित मधेशवादी दलहरु आफ्नो नैतिकता बिर्सेर सत्ता भागबण्डा लागेर तिनीहरुको लाशमाथि राजनीतिमा रमाएको हो । जनमत पार्टीले गठबन्धनमा रहेर मधेशी विरुद्धको विभेद विरुद्ध उठाएको आवाजले आउंदा दिनमा अन्य दलहरु सचेत हुनेछ ।
यो विषयमा आफ्नो प्रतिक्रिया दिनुहोस् !