गठबन्धनकाे मधेश सरकार फुटको कगारमा

जनकपुरधाम, माघ ३ गते । बुलेट ट्रेनको गतिमा काम गर्ने घोषणा मधेश मुख्यमन्त्रीको सरकार एक वर्षमै फुटको कगारमा पुगेको छ ।

गठन भएदेखि नै विवादमा रहेका सत्ता गठबन्धन अहिले दुई चिरामा विभाजन भएका छन् । मन्त्रालय फुटाउने जुटाउने जसपा नेतृत्व सरकारका मुख्यमन्त्री सरोजकुमार यादवको कार्य र अर्थमन्त्री रकमान्तर विवादले शुरुदेखि नै विवादित रहेका मधेश सरकार स्वाभिमान दिवसका दिन विवाद झन् उत्कर्षमा पुगेको छ ।

सरकार गठनको एक वर्ष पूरा गरेको अवसरमा गठबन्धन आबद्ध दलहरु छुट्टाछुट्टै रुपमा स्वाभिमान दिवस मनाएका छन् । गठबन्धनमा आबद्ध सरकार नेतृत्वकर्ता जनता समाजवादी पार्टी (जसपा) नेपाल र प्रतिपक्षी नेकपा एमालेको सहभागिता माओवादी केन्द्रको नेतृत्वमा छुट्टाछुट्टै रुपमा स्वाभिमान दिवस मनाइएको हो ।

मधेश सरकार नेतृत्वकर्ता जसपाको नेतृत्वमा जनकपुरधाम स्थित महेन्द्रनारायण निधी प्रतिष्ठान र प्रतिपक्षी एमालेको नेतृत्वमा प्रदेश सभामा स्वाभिमान दिवस मनाइएको छ । जसपा नेतृत्वमा मुख्यमन्त्री सरोजकुमार यादवले अगुवाई गरेका कार्यक्रममा सत्तारुढ कांग्रेस र नेकपा एसका मन्त्री तथा नेता कार्यकर्ताहरु सहभागी भएका थिए भने एमाले सहभागी आयोजित कार्यक्रममा सत्तारुढ दल जनमत पार्टी, लोसपा, माओवादी केन्द्र सहितका दलहरु सहभागी भएका थिए ।

प्रदेश सभामा आयोजित स्वाभिमान दिवसको अध्यक्षता गरेका माओवादी केन्द्र संसदीय दलका नेता भरत साहले भने सबैं क्षेत्र र दललाई नसमेटेर एकलौटी रुपमा कार्यक्रम आयोजना गरेकाले आफूहरुले विरोध र आगामी दिनमा यस्तो गलती नदोहराउने चेतावनी स्वरुप छुट्टै स्वाभिमान दिवस मनाएको भने ।

असन्तुष्ट सत्तारुढ पक्ष लोसपाका रानी शर्मा तिवारीले छुट्टै रुपमा कार्यक्रम आयोजना गरिएका बारे भनिन् ‘सरकारको कार्यक्रम भनी जसपा नेतृत्वका मुख्यमन्त्री सरोजकुमार यादवले आफूहरुसँग कुनै समन्वय वा छलफल नगरी एकलौटी रुपमा कार्यक्रम आयोजना गरिएकोमा आफूहरुले विरोध जनाएको हो बताइन् ।

उनले भनिन् ‘मधेश आन्दोलनको जगमा देशमा संघीयता आएको हो, मधेश आन्दोलनमा हाम्रो पनि योगदान छ र ती मधेश आन्दोलनकै बलमा मधेश सरकार गठन भएको हो र त्यसमा हामी पनि सहभागी छौं । तर कार्यक्रम तालिका र प्रमुख अतिथि बारे कुनै छलफल नै नगरी एकलौटी रुपमा जसपामय बनाउन खोजेकोमा आफूहरुको असन्तुष्टि हो ।’

यस्तै जनमत पार्टी दलका नेता एवं शिक्षा तथा संस्कृति मन्त्री महेश यादवले मुख्यमन्त्रीज्यूले स्वाभिमान कार्यक्रमलाई जसपामय बनाउन खोजेकोमा आफूहरुले त्यसको विरोधमा उभेको बताए । उनले भने सरकारमा हामी पनि सहभागी छौं, त्यसको ख्यालै नगरी अन्य दललाई बाईपास नगरी एकलौटी रुपमा कार्यक्रम गरेकोमा विरोध स्वरुप छुट्टै स्वाभिमान दिवस मनाएको हो ।’

यता असन्तुष्ट गठबन्धनका दलहरुले छुट्टै रुपमा मनाएको कार्यक्रम बारे मुख्यमन्त्री सरोजकुमार यादवले भने पछिल्ला सभामुखको कार्यकालमा यही दलका नेताहरुले आफूलाई सहयोग गरेका थिए । अहिले के कति कारणले एक वर्षमै आफ्नो विरोध गर्न थालेको बुझ्न नसकेको बताए ।

हुनत, अर्थमन्त्री संजय यादवले कार्यक्रम स्थल प्रदेश सभा पुगेर असन्तुष्ट गठबन्धन दलका नेताहरूलाई फकाउन प्रयास गरेपनि सफल हुन सकेन । मुख्यमन्त्रीज्युले एकलाैटी गर्दै छलफल नै नगरी जसपामय बनाउन खाेजेकाे भनी असन्तुष्टि व्यक्त गर्दै सरकारकाे स्वाभिमान दिवसमा जान मानेन ।