जनकपुरधाम, पुस १७ गते । महोत्तरी जिल्लाको मटिहानी नगरपालिकास्थित प्रसिद्व लक्ष्मी नारायण मठका साधु सन्तहरुलाई चिसोबाट जोगिन नगरपालिकाले कम्बल वितरण गरेका छन् । मंगलवार एक समारोहकाबीच मटिहानी नगरपालिकाका मेयर हरिप्रसाद मण्डलद्वारा मठका साधुसन्तहरुलाई कम्बल वितरण गरिएको हो ।
तराईमधेशका जिल्लाहरुमा केहि दिनदेखि एक्कासी बढेको चिसोले लक्ष्मीनारायण मठमा बस्दै आएका साधुहरुलाई भइरहेको समस्याको मध्यनजर गर्दै चिसोबाट जोगिन राहत स्वरुप कम्बल वितरण गरिएको मेयर मण्डलले बताए ।
कम्बल पाएपछि मठका साधु ५० वर्षीय शिवसरण दासले चिसोले गर्दा मठमा बस्दै आएका साधु बाबाजी निकै समस्या भइरहेको थियो । नगरपालिकाद्वारा वितरण गरिएको यो कम्बल जीवनरक्षाको काम गरेको भनी खुशी व्यक्त गरे । लक्ष्मीनारायण मठका ४० जना साधुहरुलाई कम्बल वितरण गरिएको कुरा नगरपालिकाले जनाएको छ ।
लक्ष्मीनारायण मठका साथै पीर बाबा मजारको सरसफाई तथा रेखदेख गर्दै आईरहेका हसन फकीरलाई पनि कम्बल बितरण गरिएको छ । उक्त कार्यक्रममा मटिहानी नगरपालिका वड़ा नं. ६ र ८ का वड़ा अध्यक्ष क्रमशः कलीम अंसारी र रितेश साह, शिक्षा शाखा प्रमुख चन्देश्वर साह, राजकीय संस्कृत माविका प्रधानाध्यापक ईश्वरी पौडेल लगायतका व्यक्तिहरुको उपस्थिति रहेको थियो ।
यो विषयमा आफ्नो प्रतिक्रिया दिनुहोस् !