जनकपुरधाम, पुस १५ । सस्ताे लाेकप्रियताका लागि मधेश सरकारका मन्त्रीहरू गिर्छन भने कसैलाई विश्वास थिएन ।
शनिवार दिउंसाे अस्पताल छड्केकाे क्रममा प्रादेशिक अस्पताल जनकपुरमा बिचाैलिया भनी एचआईभी एड्स क्षेत्रमा काम गर्ने दुई व्यक्तिलाई प्रदेशको स्वास्थ्य तथा जनसंख्या मन्त्री वीरेन्द्र सिंहले प्रहरी लगाएर थुनाई दिए ।
यति मात्र हाेइन मन्त्री पिएले स्वयं भिडियाे र फाेटाे खिचेर राष्ट्रिय तथा स्थानीय मिडियामा पठाई मन्त्रीजीले आफै दुई बिचाैलियालाई प्रादेशिक अस्पतालबाट पक्राउ गरि समाचार लेख्न लगायाे ।
मन्त्री सिंहले पक्राउ गर्न लगाएका दूबै जनालाई जिल्ला प्रहरी कार्यालयमा पुग्दा सोधपुछको क्रममा दूबै जना बिचौलिया नभई एचआइभी संक्रमितहरुको उपचारको क्षेत्रमा काम गर्दै आईरहेको गैर सरकारी संस्था स्पर्श नेपालको कर्मचारी ठहरियाे ।
पक्राउ पर्नेमा स्पर्श नेपालमा कार्यरत रामविनय यादव र राकेश पासवान थिए । शुक्रबार विहान ९.३० बजे प्रादेशिक अस्पताल प्रादेशिक अस्पतालमा एक जना एचआइभी संक्रमित महिलाले बच्चा जन्माएकी थिइन् । त्यो एचआइभी संक्रमित महिलाले जन्माएको बच्चामा एचआइभी संक्रमण रहे नरहेको विषयमा बुझ्न स्पर्श नेपालका दूबै कर्मचारी पुगेका थिए ।
स्पर्श नेपालका नविन मल्लिकका अनुसार बच्चामा एचआइभीको संक्रमण रहे नरहेको जाँचका लागि हाम्रो कर्मचारी प्रादेशिक अस्पताल पुगेका थिए । तर महिलाको परिवार स्पर्श नेपालको पिडारी चोकमा रहेको कार्यालयमा स्वाब संकलनका लागि तयार नहुँदा उनीहरुलाई काउन्सलिंग गरिरहेकै क्रममा मन्त्री सिंहले घटनाक्रम नबुझेरै बिचौलिया भनी पक्राउ गर्न लगाएको गुनासो गरे ।
उनले भने ‘हाम्रो कर्मचारी एचआइभी संक्रमित महिला र उनको परिवारलाई एचआइभी जाँचका लागि काउन्सलिंग गरिरहेका थिए, तर सोही समयमा यो बिचौलिया हो, बिरामीलाई निजी अस्पतालमा उपचार गराई दिन्छु भन्दै लान लागेको हल्ला भएपछि अस्पतालको छडके अनुगमनका लागि पुगेका मन्त्री सिंह बिचौलिया भन्दै प्रहरी भिडाएर पक्राउ गर्न लगाए ।’
यता प्रादेशिक अस्पताल भित्रै रहेको एआरटी सेन्टरका जितेन्द्र यादवले स्पर्श नेपालका दूबै कर्मचारी हामीसंग समन्वय नै नगरी महिला र बच्चालाई लान खोजेपछि उनीहरुलाई पक्राउ गरिएको बताए ।
यता स्पर्श नेपालका मल्लिकले आफूहरुको संस्था नेपाल सरकारबाट इजाजत लिएरै प्रादेशिक अस्पतालको एआरटी शाखामा प्रतिनिधि राखेर काम गर्दै आईरहेका छौँ बताए । यस अघि पनि प्रादेशिक अस्पतालबाट एचआइभी संक्रमित पत्ता लगाई उनीहरुको उपचार गराई रहेको उनको भनाई थियो ।
यता जिल्ला प्रहरी कार्यालय धनुषाले प्रसूती महिलाको परिवारसंग छलफल गराएर पक्राउ परेका दूबै जनालाई छोडेको छ । महिलाको बच्चाको अन्त्यमा स्पर्श नेपालको पिडारी चोकस्थित रहेको कार्यालय लगेर स्वाब संकलन समेत गरिएको छ ।
यो विषयमा आफ्नो प्रतिक्रिया दिनुहोस् !