जनकपुरधाम, पुस ७ गते । भारतको अयोध्यमा भगवान श्रीरामको नवनिर्मित मन्दिरको हुन गइरहेको प्राण प्रतिष्ठाको अवसरमा जनकपुरधामबाट भार (पाहुर) पठाउने तयारी अघि बढाइएको छ ।
मिथिला संस्कृति अनुसार कुनै व्यक्तिको नवनिर्मित घरको गृह प्रवेशको अवसरमा उनको श्रीमतिको माइतीबाट पाहुर पठाउने परम्परा रहेको छ । सोही परम्परा अनुसार भगवान श्रीरामको ससुराली र माता जानकीको माइत मिथिला भएकाले मिथिलाको राजधानी जनकपुरधामस्थित जानकी मन्दिरको अगुवाईमा भगवान श्रीरामको गृह प्रवेशको अवसरमा पाहुर पठाइने जनाइएको छ ।
जनकपुरधामबाट अयोध्या पाहुर पठाउने तयारी जानकी मन्दिरद्वारा शनिवारदेखि शुरु गरिएको छ । भगवान श्रीरामसँगै माता जानकीको गृह प्रवेश भइरहेको अवसरमा माता जानकीको माइत जनकपुरधाम भएकाले मिथिला संस्कृति अनुसार पाहुर पठाउने तयारी थालिएको जानकी मन्दिरका उत्तराधिकारी महन्थ रामरोशन दास वैष्णवले जानकारी दिए ।
अयोध्याका लागि जनकपुरधामबाट ४ जनवरीका दिन पाहुर पठाइनेछ भने ६ जनवरीको श्रीराम मन्दिर तिर्थ ट्रस्टको जिम्मा लगाइने उहाँले बताउनु भयो । पाहुरमा विभिन्न प्रकार कपडा, आभुषण, भाडावर्तनका साथै विभिन्न मिठाई तथा पकवान रह्ने उत्तराधिकारी महन्थ दासले बताए । जनवरी २२ तारिखमा भारतको अयोध्यामा निर्माण गरिएको नयाँ मन्दिरमा भगवान रामको प्रतिमाको पाण प्रतिष्ठा हुने कार्यक्रम रहेको छ ।
सो पाहुर यात्रा तयारीका लागि ११ सय सदस्यीय मूल समारोह समिति समेत गठन गरिएको जसको नेतृत्व जानकी मन्दिरका उत्तराधिकारी महन्थ रामरोशन दास वैष्णवले गर्नेछन् । उत्तराधिकारी महन्थ दासका अनुसार समितिको संरक्षकको रुपमा जानकी मन्दिरका महन्थ रामतपेश्वर दास वैष्णव, जनकपुरधाम उपमहानगरपालिकाका प्रमुख मनोजकुमार साहलाई चयन गरिएको छ ।
जनकपुरधामबाट जलेश्वर नाथबाट हुलाकी सडक हुँदै मलंगवाबाट सिम्रौनगढ हुँदै गढीमाइ हुँदै वीरगञ्जमा रात्री विश्राम गर्ने योजना रहेको बताए । त्यसको भोली पल्ट ८ बजे यात्रा प्रारम्भ हुने र वीरगञ्जको जानकी नगर गेट हुँदै बेतिया, कुशी नगर, सिद्धार्थ नगर हुँदै गोरखपुर अयोध्यामा पुगेर रात्री विश्राम गर्ने कार्यक्रम रहेको उत्तराधिकारी महन्थ रोशनले जानकारी दिए । अध्योध्या पुगेको भोली पल्ट ६ तारिखका दिन विधिवत राम जन्मभूमि राममन्दिर ट्रष्टलाई सम्पूर्ण भार हस्तान्तरण गर्ने कार्यक्रम रहेको उनले जानकारी दिए ।
यो विषयमा आफ्नो प्रतिक्रिया दिनुहोस् !