जनकपुरधाम, ६ पुस । भारतको संदिप विश्वविद्यालयले उच्च शिक्षाप्रति विद्यार्थीहरुलाई आकर्षित गर्ने बारे जनकपुरधाममा शिक्षाविद तथा शिक्षा क्षेत्रसंग सम्बन्धित व्यक्तित्वहरुसंग छलफल गरेका छन् ।
शिक्षा क्षेत्रमा व्यवसायिकता बढिरहेको समयमा संदिप युनिवर्सीटीका सुनिल झाको अगुवाईमा आएको टोलीले शिक्षाविद तथा शिक्षा क्षेत्रमा कार्यरत व्यक्तित्वहरुसंग छलफल गरेको हो । संदिप विश्वविद्यालयले भारतको नासिक र मधुवनीको सिजौलमा दुई स्थानमा कलेज संचालनमा गर्दै आएको छ ।
छलफलमा कतिपय विद्यार्थी एसईई वा कक्षा १२ पछि पढाई छाड्ने र पढन चाहने विद्यार्थीहरु पनि अधिकांश मेडिकल नै रोज्ने भएकाले अन्य संकायतर्फ पनि विद्यार्थीलाई आकर्षित गर्ने बारे कुरा भएको छ । मेडिकल बाहेकका अधिकांश कोर्सको पढाई हुँदै आईरहेको सो कलेजप्रति नेपाली विद्यार्थीलाई समेत आकर्षित गर्ने उद्देश्यले शिक्षाविद तथा शिक्षा प्रेमीहरुसंग छलफल गरेको हो ।
विश्वविद्यालयका सुनिल झाले जनकपुरधामका शिक्षाविद तथा शिक्षाप्रेमीहरुलाई यहाँका विद्यार्थीहरुलाई आफ्नो लक्ष्य प्राप्तिका लागि उचित स्थलको छनौट गर्ने छुट दिन आग्रह गरे । उनले विद्यार्थी अध्ययन गर्ने थलोको छनौट गर्ने विषयमा स्वतन्त्र नभएसम्म शिक्षा पनि ग्रहण गर्न नसक्ने बताए ।
उनका अनुसार पछिल्लो वर्ष नासिकस्थित कलेजमा १ सय ५० भन्दा बढी नेपाली विद्यार्थीहरुले संदिप युनिवर्सीटीमा नामांकन गराएका थिए । यसका साथै आउने वर्षदेखि मधुवनीस्थित सिजौलमा रहेको कलेजमा समेत नेपाली विद्यार्थीहरुको नामांकन गरिने झाले बताए ।
यो विषयमा आफ्नो प्रतिक्रिया दिनुहोस् !