जनकपुरधाम, पुस २ गते । श्रीराम जानकी विवाह पञ्चमी महोत्सव आज दिउंसो रामकलेवा र जन्तीलाई विदाई गरी सम्पन्न भएको छ ।
आइतबार राति मिथिला परम्परा अनुसार प्रतिकात्मक भगवान राम र सीताको विवाह जानकी मन्दिरमा सम्पन्न भएपछि आज अयोध्याबाट जन्ती आएका साधु सन्तहरुलाई भोजन गराउने विधि रामकलेवा विधि गरिएको छ ।
जन्तीसहित देश विदेशबाट आएका साधुसन्तहरुलाई मिथिला परम्परा अनुसार ५६ प्रकारका व्यञ्जनसहित भोजन गराइएको जानकी मन्दिरका उत्तराधिकारी महन्थ रामरोशन दासले जानकारी दिएका छन् । भोजनमा जन्तीसहितका साधु सन्तहरुलाई दाल, भात, चार प्रकारका तरकारी, दही, बरी, तिलौरी, दनौरी, पापर अचार, मिठाईसहितका परिकार खुवाइएको छ ।
भोजन पश्चात जन्ती तथा साधुसन्तहरुलाई दक्षिणा स्वरुप नगद रुपैया, वस्त्र र कम्बल समेत प्रदान गरेको छ । जन्तीले भोजन गर्ने क्रममा मिथिलाको परम्परा अनुसार मैथिल भाषाको गाली गलौज समेत भगवान श्रीराम पक्षलाई मिथिलाका नारीहरुले दिएका छन् ।
अयोध्याबाट डा. रामेश्वर दास र मुनिबाबाको नेतृत्वमा दर्जनौको संख्यामा साधुसन्तहरु जन्ती आएका थिए । रामकलेवापछि अयोध्याबाट आएका जन्तीको नेतृत्व गरेका राजा दशरथको भूमिकामा डा. रामेश्वर दास र राजा जनकको भूमिकामा जानकी मन्दिरका महन्थ रामतपेश्वर दास वैष्णव सम्धी मिलान गरेका छन् । यो रामकलेवा सँगै एक सातादेखि जारी श्रीराम जानकी विवाह पञ्चमी महोत्सव सम्पन्न भएको छ ।
विवाहपञ्चमी महोत्सव अन्तर्गत पहिलो दिन नगर दर्शन, दोस्रो दिन फूलबारी लीला, तेस्रो दिन धनुष यज्ञ, चौँथो दिन तिलकोत्सव, पाँचौँ दिन मटकोर, छैँटौँ दिन स्वयंवर र राति वैवाहिक कार्यक्रम सम्पन्न भएको छ ।
यो विषयमा आफ्नो प्रतिक्रिया दिनुहोस् !