जनकपुरधाम, मंसिर २६ गते । श्रीरामजानकी विवाह महोत्सवको अवसरमा जनकपुरधाममा पहिलोपटक अनाजबाट बनाउन लागिएको ११ हजार ११ स्क्वायर फिटको प्रतिमा (मूर्ति) बनाउने काममा तिव्रता दिइएको छ ।
जनकपुरधामको बाह्रबिघा मैदानमा अनाजको प्रयोगले ११ हजार ११ स्क्वायर फिटको मुर्ति बनाउन लागिएको काम तिव्र रुपमा भइरहेको जनकपुरधाम उद्योग वाणिज्य संघका अध्यक्ष एवं श्रीराम जानकी अनाज प्रतिमा निर्माण समितिका संयोजक जितेन्द्र महासेठले जानकारी दिएका छन् ।
उनका अनुसार मंसिर २४ गतेदेखि बाह्रबिघाको उत्तर पूर्व कुनामा अन्नको मुर्ति बनाउन थालिएको हो । मुर्ति तयारी गर्न अझै दुईतीन लाग्न सक्छ । जनकपुरमा हुने विवाह पञ्चमीलाई विश्वभर चिनाउन र कीर्तिमान कायम गर्न अनाजको मूर्ति बनाउन लागिएको उनले बताए । यसअघि भारतको अयोध्यामा बनेको १० हजार ८०० स्क्वायर फिटको मूर्ति बनाएर विश्व रेकर्ड बनाइएको थियो । जनकपुरमा ११ हजार ११ स्क्वायर फिट मुर्ति बन्नेसँगै विश्वमै सबै भन्दा ठुलो अनाजको मुर्ति बनाउने कीर्तिमान जनकपुरधामको नामम दर्ज हुनेछ ।
मुर्ति बनाउनका लागि भारतको मध्य प्रदेशबाट आठजना कालिगड बोलाइएको छ भने दुईजना नेपाली पनि सहभागी छन् । ‘मूर्ति बनाउन अनाजको मात्र प्रयोग हुन्छ । मूर्तिका लागि कुनै रङ्ग प्रयोग गरिने छैन । जहाँ जुन रङ्गको आवश्यकता पर्छ, सोही रङ्गको अन्न प्रयोग गरिन्छ ।’ उनले जनाए अनुसार भगवान श्रीरामजानकीको विवाह दृश्य सहितको प्रतिमा तयार पार्न ७० क्विन्टल अन्न लाग्ने अनुमान गरिएको छ ।
७० क्विन्टल जति अनाज भगवानको मूर्ति बनाउने कार्यमा खेर जाने लाग्दै आएको आरोपमा संयोजक महासेठले अनाज खेर जांदैन प्रयोगमा नै ल्याइन्छ भने । उनले भने ९० प्रतिशत अनाज सुरक्षित नै रहन्छ जो यहाँका वृद्धाश्रम, अनाथ आश्रम, जानकी मन्दिरको भण्डारा र मानव सेवा आश्रमलाई दिइने छ । बांकी मुश्किलले १० प्रतिशत खेर जाने अनाजलाई पनि गाईवस्तु चौपायाको दाना तयार गरेर गौशालालाई दिइने भएकाले अनाज खेर जादैन ।
साताव्यापी मनाउने सीताराम विवाह पञ्चमी महोत्सव आजदेखि सुरु भएको छ । पहिलो दिन ‘नगर दर्शन’ कार्यक्रम सम्पन्न गरिएको छ भने दोस्रो दिन फूलबारी लीला (विवाह मण्डपको फूलबारीमा), तेस्रो दिन धनुषयज्ञ (रंगभूमि मैदानमा), चौथो दिन तिलकोत्सव (राम मन्दिर परिसरमा) र पाँचौँ दिन मटकोर (गंगासागर पोखरी घाटमा)मा गरिनेछ । छैटौँ दिन अर्थात् पुस १ गते सीताराम स्वयंवर तथा शुभ विवाह र सातौँ दिन (राम कलेवा) कार्यक्रम भएपछि विवाह पंञ्चमी सम्पन्न हुनेछ ।
यो विषयमा आफ्नो प्रतिक्रिया दिनुहोस् !