जनकपुरधाम, २० मसिंर । जनकपुरधाम वडा नम्बर २३ मा वरिष्ठ पत्रकार तथा प्रेस स्वतन्त्रता सेनानी राजेश्वर नेपालीको स्मृतीमा क्रिकेट प्रतियोगिता आयोजना गरिएको छ ।
पत्रकार नेपालको गृह गाउँ समेत रहेका विन्घीमा शुरु भएको राजेश्वर नेपाली टि–२० क्रिकेट प्रतियोगितामा कुल १६ टिमको सहभागिता जनाएका छन् । १३ दिन सम्म चल्ने जिल्ला स्तरीय प्रतियोगीताको जनकपुरधाम उपमहानगरपालिकाका प्रमुख मनोज कुमार साहले समुद्घाटन गरेका छन् । मेयर साहले बल्लेबाजी र वडाध्यक्ष राघवेन्द्र साहले बलिँग गर्दै संयुक्त रुपमा खेलको उद्घाटन गरेका थिए ।
उद्घाटन सत्रलाई सम्बोधन गर्दै मेयर साहले भने उपमहानगरपालिकाले खेलको विकासलाई उच्च प्राथमिकतामा राखेकोले नगर क्षेत्रका खेलकुद मैदानलाई व्यवस्थित बनाउन वडा कार्यालयहरूलाई आग्रह गरे । साथै उनले अन्तराष्ट्रिय टीमहरुसँग प्रतिष्पर्धा गर्ने गरी टीम बनाउन टेनिस बलसँग खेलाडीहरुलाई नखेलाउन आयोजकहरुसँग आग्रह समेत गरेका थिए ।
नेपालको पत्रकारिता इतिहासमा स्वर्गीय राजेश्वर नेपालीको ठूलो योगदान रहेको बताउँदै मेयर साहले वहाँको स्मृतीमा क्रिकेट टुर्नामेन्ट हुन लागेकोमा खुशी व्यक्त गरे । कार्यक्रममा स्व. नेपालीका सुपुत्र तथा वडा नंं २३ का वडाध्यक्ष राघवेन्द्र साहले युवाहरूलाई कुलतबाट जोगाउन खेलकुद महत्वपूर्ण माध्यम भएकाले खेलको विकासका लागि प्रतियोगिताको आयोजना गरिएको बताए ।
प्रतियोगिताको उद्घाटन सत्रमा खेलका संयोजक रमेश साह, स्थानीय अगुवा युवा केवल शर्मा, पत्रकार श्रीनारायण साह सहितका वक्ताहरूले प्रेस स्वतन्त्रता सेनानी वरिष्ठ पत्रकार राजेश्वर नेपालीको नाममा भइरहेको प्रतियोगिताको प्रशंसा गरे । दुधमति युवा क्लब वडा नंं २३ वेला जनकपुरधामको आयोजनामा शुरु भएको प्रतियोगितामा धनुषा तथा महोत्तरीका टिमको सहभागिता रहेको छ ।
पहिलो दिनको खेलमा अलिपट्टीको क्रिकेट टिमले बलवाको टिमलाई पराजित गरेको थियो । बलवाले दिएको ८७ रनको लक्ष्य २ विकेटमा पुरा गर्दै अलिपटीले ८ विकेटले जित हासिल गरेको हो । प्रतियोगितामा फाइनल विजयी टिमलाई ५५ हजार ५५५ र उपविजेतालाई २५ हजार ५५५ सहित शिल्ड प्रदान गरिने जनाइएको छ ।
पत्रकार र जनप्रतिनिधी समेत भिडने
प्रतियोगीताको दौरान अगामि २९ गते नेपालका प्रथम राष्ट्रपति डा.रामवरण यादवको सामुने पत्रकार तथा जनप्रतिनिधीहरु बिच मैत्रीपुर्ण क्रिकेट प्रतिस्पर्धा हुने वडा अध्यक्ष साहले बताए । चुरे संरक्षणका लागि पत्रकार र जनप्रतिनिधी अग्रसर हुनपर्ने उद्देश्यलाई दर्शाउन पत्रकार र जनप्रतिनिधीहरु बिच प्रतियोगीता हुने जस्मा प्रतियोगीता बारे दैनिक प्राथमिकताका साथ कभरेज गर्ने मिडियाका पत्रकार र जनप्रतिनिधीको सहभागिता हुने उनले बताए । उनले सो खेलका विजेता पनि ११ हजार पुरस्कारबाट पुरस्कृत हुने पनि घोषणा गरे ।
यो विषयमा आफ्नो प्रतिक्रिया दिनुहोस् !