जनकपुरधाम, २० मंसिर । केपी ओली कप टी ट्वेंटी क्रिकेट प्रतियोगितामा ऐतिहासिक जीत हासिल गरेका प्रादेशिक क्रिकेट टीमलाई मधेश सरकारले पांच लाख रुपैया सहयोग गर्ने भएको छ ।
विजेता मधेश प्रदेश टिमका खेलाडी एवं पदाधिकारीहरुलाई मुख्यमंत्री सरोजकुमार यादवले सम्मान सहित बधाई दिंदै प्रोत्साहन स्वरुप पांच लाख रुपैया सहयोग गर्ने घोषणा गरे । उनले खेलाडीलाई सम्मान गर्दै भने आफु आएदेखि नै खेलकुद विकासको लागि आफू प्रतिवद्ध छु । प्रदेशका खेलाडीहरुका लागि प्रदेशका ८ वटै जिल्लामा खेलकुद स्टेडियम बनाउन लागेको र जनकपुरधाम स्थित श्रीराम जानकी अन्तराष्ट्रिय रंगशाला निर्माणको पहल समेत थालिसकेको छु ।
मुख्यमन्त्री यादवले श्रीराम जानकी रंगशाला निर्माणका लागि भारतीय प्रधानमन्त्री नरेन्द्र मोदीले घोषणा गरेको भारतीय एक अर्ब रुपैया सहित दूई अर्ब लगानी गर्ने सुविधा सम्पन्न खेलकूदको हब बनाउने गरी रंगशाला निर्माणका लागि राष्ट्रिय खेलकूद विकास परिषद् र रंगशाला निर्माण समितिसँग कुरा अगाडि बढाइसकेको बताए । उक्त अवसरमा मुख्यमंत्री यादव, प्रदेश सभा सदस्य रामाशीष यादव एवं प्रदेशका प्रमुख सचिव दिनेश कुमार घिमिरेले खेलाडीहरु, प्रशिक्षक एवं पदाधिकारीहरुलाई खादा ओढाई सम्मान गरेको थियो ।
पोखरामा मंसिर १५ गते भएको रोमांचक फाइनलमा मधेश प्रदेशले राष्ट्रिय खेलाडी सामेल त्रिभुवन आर्मी क्लबलाई ११ रनले पराजित गरेको थियो ।
यस अघि धनुषा जिल्ला क्रिकेट संघका उपाध्यक्ष आकाश पाण्डेले सम्मानबाट खेलाडीहरु उत्साहित भएको बताएका थिए । नेपाल क्रिकेट संघ (क्यान) का केन्द्रीय उपाध्यक्ष रोशन सिंहले खेलाडीले सारा देश र प्रदेशलाई खुशी दिन्छ तसर्थ खुशीयाली दिनेहरुका खुशीको बाटो खोल्न, खेल क्षेत्रलाई उच्च प्राथमिकतामा राख्न मुख्यमंत्रीसंग आग्रह गरेका थिए ।
यो विषयमा आफ्नो प्रतिक्रिया दिनुहोस् !