जनकपुरधाम, मंसिर १५ गते । मधेस प्रदेशमा एचआईभी संक्रमणको दर दिनानुदिन ह्वातै बढदै गएको छ । चार वर्षको अवधिमा १ हजार ४ सय जति उपचारत संक्रमितको संख्या बढेको छ । आर्थिक वर्ष २०७६÷०७७ मा २ हजार ५२९ बाट बढेर उपचारत संक्रमितको संख्या ३ हजार ९२६ पुगेको हो ।
३६ औँ विश्व एड्स दिवसको अवसरमा बुधवार धनुषाको सपहीमा स्वास्थ्य निर्देशनालयद्वारा आयोजित कार्यक्रममा फेला परेका मध्ये २ सय ३८ जना संक्रमित अझै सम्पर्कमा नरहेकाले उपचार सेवाबाट अझै वञ्चित रहेका छन् । संक्रमित मध्ये १७६ जना १८ वर्ष मुनिका रहेका छन् । जसमध्ये बुवाआमा दुवै नरहेका टुहुरा १५ जना रहेको छ ।
मधेस प्रदेशको स्वास्थ्य निर्देशनालयको तथ्यांक अनुसार पर्सामा सबैभन्दा १ हजार २८७ जना एचआइभीका संक्रमित छन् । त्यस्तै धनुषामा ७६८, महोत्तरीमा ३३७, बारामा १९१, सप्तरीमा १७३, सिरहामा ३५१, सर्लाहीमा ४७० र रौतहटमा ३४९ जना एचआइभीका संक्रमित उपचारत रहेका छन् । तथ्यांक अनुसार अनुमानित ४ हजार ४ सय रहेकोमा ४ हजार १६२ जनामा फेला परेकामा ३ हजार ९२६ उपचारत रहेको छ भने २३८ जना सम्पर्कविहिन छन् ।
निर्देशनालयका राजवीर यादवले प्रस्तुत गरेको तथ्यांक अनुसार मधेस प्रदेशमा आ.व. ०७६/७७ मा १४ हजार ६ सय २ चेकजाँचमा ४ सय र आ.व. ०७७/७८ मा सो संख्या बढदै २५ हजार ९ सय ७८ चेकजाँच गर्दा ४ सय ७५ जना संक्रमित फेला परेको थियो । त्यस्तै आ.व. २०७८/०७९मा ३६ हजार २६ जनामा चेकजाँच गर्दा ६ सय ७५ जना र आ.व. २०७९/०८०मा ४३ हजार ४ सय ७५ जनामा चेकजाँच गर्दा ६ सय ६ जनामा एचआइभी पोजिटिभ पाइएको छ ।
एचआईभी नियन्त्रणका लागि प्रदेशमा जाँच तथा परामर्श केन्द्रहरु १० वटा, उपचार केन्द्रहरु १०, निशुल्क औषधी वितरण केन्द्र ८, लागू पदार्थको मौखिक पद्दतिद्वारा उपचार केन्द्र र भाइरल लोड परिक्षण केन्द्र एउटा÷एउटा संचालनमा रहेको र संक्रमित आमाबाट जन्मिने बच्चामा संक्रमण रोकथाम सम्बन्धी सेवाहरु सबै स्वास्थ्य संस्थामा सेवा उपलब्ध रहेको निर्देशनालयका यादवले जानकारी दिए ।
कार्यक्रममा एक एचआईभी संक्रमितहरु नागरिकता समस्या मात्र नभई रोजगार, शिक्षा र समाजमा सम्मानका साथ बस्न पाउने समस्या समेत भोग्दै आएको पीडा सुनाईन । उनले भनिन् भने एचआईभी संक्रमित सुन्ने बितिकै चौक चौराहा मात्र होइन गाउँ समाजका व्यक्ति मात्र होइन परिवार समेत अपहेलना गर्दै आएको छ ।
आफूहरुलाई अछुत सम्झेर अन्य व्यक्ति सरह व्यवहार गर्दैनन् अपहेलित भएर बांच्नुपर्ने अवस्था रहेकाले समाजमा बस्न पाउने अवस्था बनाई दिन प्रदेश सरकारसँग माग गरे । साथै ती पिडीत संक्रमितले प्रदेश सरकारबाट दिंइदै आएको एक हजार भत्ता कट्टा गरिएकोमा त्यसमा अझ थपेर निरन्तरता दिन आग्रह गर्दै जिविकोपार्जनका लागि तालिम सीपको व्यवस्था गर्न माग समेत गरिन् ।
कार्यक्रमका प्रमुख मधेस स्वास्थ्य तथा जनसंख्या मन्त्री विरेन्द्र सिंहले एड्सबाट पीडित रोगीहरुलाई समाजमा गरिने हेलाप्रति चिन्ता व्यक्त गरे । उनले अन्य रोगजस्तै एड्सपनि रहेकाले एड्स रोगीहरु पनि सामान्य जीवनयापन गर्न सक्ने वातावरणको निर्माण गर्न आग्रह गरे । यसका साथै मन्त्री सिंहले एचआईभी संक्रमित बालबालिकाको स्याहार सुसार र भरणपोषणका लागि उपलब्ध गराइने कावा भत्तालाई प्रदेश सरकारले निरन्तरता दिने प्रतिवद्धता व्यक्त गरे । कार्यक्रममा स्वास्थ्य तथा जनसंख्या मन्त्रालयका सचिव डा. प्रमोद यादव, स्वास्थ्य निर्देशनालयका निर्देशक डा. राजीव झा लगायतले बोलेका थिए ।
यो विषयमा आफ्नो प्रतिक्रिया दिनुहोस् !