जनकपुरधाम, मंसिर १२ गते । श्रीराम जानकी विवाह पञ्चमी महोत्सवको तयारीमा जनकपुरधाम उपमहानगरपालिका आजदेखि जुटेको छ ।
आउंदो मंसिर २६ गतेदेखि पुस २ गते मनाइने श्रीराम जानकी विवाह महोत्सको तयारी स्वरुप पहिलो चरणमा उपमहानगरपालिकाका मेयर मनोज साहको नेतृत्वको टोलीले जनकपुरधामस्थित बारहविघाको अवलोकन गरेका छन् ।
वडा नम्बर १० का अध्यक्ष मिथिलेश कर्णसहित उपमहानगरपालिकाका प्राविधिक टोलीले होत्सवमा सहभागी हुन आउने साधुसन्त र श्रद्धालुहरुको लागि विश्रामस्थल, शौचालय र खानेपानी व्यवस्थापनका लागि बारहविघाको अवलोकन गरिएको मेयर साहले बताएका छन् ।
यसअघि जानकी मन्दिरमा सीताराम विवाह महोत्सवको तयारी सन्दर्भमा सर्वपक्षीय बैठक सम्पन्न भएको थियो । सो बैठकबाट विवाह पञ्चमी महोत्सवका लागि लागि १ सय ५१ स्दस्यीय मूल समिति र स्वास्थ्य, यातायात, सुरक्षा, खानेपानी, प्रचारप्रसार, मञ्च व्यवस्थापन, सजावट, दीपावली उत्सवको व्यवस्थापनका लागि उपसमितिहरु पनि गठन गरिसकिएको छ ।
सीताराम विवाह महोत्सवको साताव्यापी कार्यक्रम अन्तर्गत मंसिर २६ गते जनकपुरधाम नगर दर्शन, २७ गते फूलवारी लीला, २८ गते धनुष यज्ञ, २९ गते तिलकोत्सव , ३० गते मटकोर, पुस १ गते स्वयमवर तथा विवाह उत्सव र २ गते राम कलेवा रहेको छ । यसका साथै विवाह पञ्चमीका दिन हेलिकप्टरबाट पुष्पवृष्टि गरिने कार्यक्रमसमेत तय भएको छ ।
त्रेता युगमा जनकपुरधाममा राजा जनकद्वारा धनुष भङ्गको प्रस्ताव राख्नु, धनुष भङ्ग गर्नेसँग पुत्री सीताको विवाह गर्नु र अयोध्याका राजकुमार रामद्वारा गुरू विश्वामित्रसँग जनकपुरधाम आइ धनुष भङ्ग गरी सीतासँग स्वयमवर गर्नु आदि स्मृतिमा सीताराम विवाह महोत्सव यहाँ मनाइदै आएको छ । रामायण अनुसार जनकपुरधामको रङ् गभूमिमा आयोजना गरिएको सो स्वयमवरमा विभिन्न देवी देवताको उपस्थिति रहेको थियो । यसै प्रसङ्गलाई विभिन्न पक्षद्वारा प्रतीकात्मक रूपमा देखाउनु नै सीताराम विवाह महोत्सवको विशेषता रहेको छ ।
यो विषयमा आफ्नो प्रतिक्रिया दिनुहोस् !