जनकपुरधाम, मंसिर ११ गते । राष्ट्रिय स्वतन्त्र पार्टी (रास्वपा) को केन्द्रीय समिति र संसदीय दलकोसंयुक्त बैठक महोत्तरीको जलेश्वरमा आजदेखि शुरु भएको छ ।
राष्ट्रिय स्वतन्त्र पार्टीका सभापति रवि लामिछानेले कमला माईलाई साक्षी राखेर मधेशलाई ह्दयभित्र राखेर काम गर्ने कसम खाएका छन् । केहि दिनदेखि मधेशका जिल्लाहरुमा सक्रिय लामिछाने आज विहान कमला नदीमा लागेको कार्तिक पूर्णिमा मेलाको आरतीमा सहभागी भए । आरतीपछि सम्बोधन गर्दै उनले पत्रकारिताबाट जति गरे त्यो पर्याप्त नभएपछि राजनीतिमा आएको बताए ।
उनले भने, ‘राजनीतिमार्फत जति गर्न सक्छु, दिल खोलेर गर्छु । मन खोलेर गर्छु । मधेशलाई ह्दयभित्र राखेर काम गर्नेछु । र, परिणाम देखाउनेछु ।’ उनले बोलेको सबै कुरा गर्ने भन्दै कमलामाईको कसम समेत खाए । उनले भने– म कुनै अपेक्षा राखेर बोलेको छैन् । मलाई थाहा छ कमलामाई साक्षी राखेर भनेको छु । आफूले बोलेको कुरा पुरा गर्नेछु । जति बोल्ने त्यति गर्ने र जति गर्ने त्यति बोल्ने स्वभावको मान्छे म हुँ ।’ मंसिर १३ गतेसम्म चल्ने तीन दिने बैठकमा पार्टीको आगामी नीति तथा राजनीतिक रोडम्याप तयार गर्ने जानकारी जनाइएको छ । रास्वपाका सभापति रवि लामिछानेले रोडम्यापका लागि १७ जनाले तयार गरेको मस्यौदा, १९ फरक फरक जिल्लाबाट आएको नागरिकका सुझाव, नीतिमाथिको बहसबाट आएका विषयहरु समेटेर निर्माण गरिने लामिछानेले बताए ।
उनले बैठकमा केन्द्रीय अनुशासन आयोग, केन्द्रीय लेखा आयोग र प्रदेशहरूबाट सांगठनिक एवं राजनीतिक प्रतिवेदन र आर्थिक प्रतिवेदन पेश गरिने बताए । सासंदहरूको र संसदीय कार्यको समीक्षा तथा महाधिवेशनको विधिबारे समेत बैठकमा छलफल हुने उनले जानकारी दिएका छन् । केन्द्रिय समिति तथा संसदीय दलको संयुक्त बैठकमा सभापति रवि लामिछानेले राजनीतिक प्रतिवेदन प्रस्तुत गर्नेछन् । बैठकमा प्रदेशका इञ्चार्ज, महामन्त्री, केन्द्रीय सदस्य, सांसद, प्रदेशका सभापति लगायतको उपस्थिति रह्ने छ । गत कात्तिक २२ र २३ गतेका लागि तय गरिएको बैठक जाजरकोट भूकम्पका कारणले स्थगित गरिएको थियो ।
पार्टी स्थापनायता रास्वपाको यो सबैभन्दा बृहत बैठक हो । बैठकको प्रारम्भमा महामन्त्री मुकुल ढकालले समसामयिक राजनीतिक तथा पार्टी गतिविधिको जानकारी गराएका छन् । महामन्त्रीपछि प्रदेशका सभापतिहरुले संगठनात्मक प्रतिवेदन प्रस्तुत गरेका छन् । सोमबार नै केन्द्रीय अनुशासन आयोगको प्रतिवेदन विभागका प्रमुख डा. भरतमणि देवकोटाले पेश गर्ने कार्यसूची छ । सोमबार नै पार्टी सभापतिबाहेक २० सांसदलाई ७ मिनेटका दरले बोल्न समय दिइएको छ । त्यस्तै पार्टी उपसभापति डोलप्रसाद अर्यालले आर्थिक तथा लेखा प्रतिवेदन पेश गर्नेछन् भने आर्थिक व्यवस्थापन विभाग प्रमुख लिमा अधिकारी र लेखा आयोगका प्रमुख अभिषेक घिमिरेले उक्त प्रतिवेदनमाथि धारणा राख्नेछन् ।
मंगलवार विहान केन्द्रीय समिति र संसदीय दलको छुट्टाछुट्टै बैठक पनि बस्नेछ । केन्द्रीय समिति र संसदीय दलको संयुक्त बैठक भने विहान ११ बजेबाट सुरु हुनेछ । बैठकमा प्रमुख सचेतक सन्तोष परियारले संसदीय दलको गतिविधिबारे एक प्रतिवेदन पेश गर्नेछन् । मंगलबार नै सभापति रवि लामिछानेले राजनीतिक प्रतिवेदन पेश गर्ने रास्वपाले जनाएको छ । महामन्त्री ढकाल र सहमहामन्त्री बुर्लाकोटीले महाधिवेशनको कार्यविधि र प्रक्रियासहितको प्रतिवेदन मंगलबार पेश गर्नेछन् । मंगलबार नीति विचार प्रतिनिधिमण्डलको बैठक पनि बस्नेछ ।
तेस्रो दिन बुधबार विहान ७ बजे सुरु हुने बैठक १२ः३० मा सक्ने कार्यतालिका छ । महाधिवेशन कार्यविधि तथा प्रक्रियामाथि दुई घण्टाभित्र सहभागीहरुले धारणा राख्नेछन् । त्यसलगत्तै, नीति र विचारमाथि बोल्नका लागि एक घण्टाको समय छुट्याइएको छ ।
यो विषयमा आफ्नो प्रतिक्रिया दिनुहोस् !