जनकपुरधाम, कार्तिक १२ गते । धनुषाको विदेह नगरपालिकाका मेयर बेचन दास र उनका भाई प्रदेशसभा सदस्य लखन दासले आफ्नो आलोचना सहन नसकी गुण्डा लगाएर स्थानीयलाई कुटपीट गराएको आरोप लगाइएको छ । विदेह नगरपालिकामा लगातार दोस्रो पटक मेयरमा निर्वाचित भएका दासले आलोचना गरेकै भरमा कार्यकर्ता लगाएर अपहरणशैलीमा कुटपीट गराउन लगाएको आरोप लगाइएको हो ।
शुक्रबार साँझ जनमत पार्टी विदेह नगरपालिका वडा नम्बर ८ कमिटीका अध्यक्ष एवं मण्डल केवट सेवा आश्रमको अध्यक्ष पदका प्रत्याशी सुरेश मण्डललाई एमाले मधेसका प्रमुख सचेतक लखन दास र नगरप्रमुख बेचन दासले अपहरणशैलीमा ज्यान मार्ने उद्देश्यले कुटपीट गराएको आरोप श्री मण्डल केवट सेवा आश्रमका राष्ट्रिय अध्यक्ष विपीन मण्डलले लगाए ।
अध्यक्ष मण्डलले नगरप्रमुख बेचन दासका छोरा भजन दास लगायतको समूहले कुटपीट गरेको आरोप लगाए । मण्डलले भने नगरप्रमुख बेचन दास र प्रदेशसभा सदस्य लखन दासले सुरेश मण्डललाई कुटपीट गर्दै प्रहरी चौकी तिनकौरियामा बुझाएको दावी गरे । उनले गाली गलौज गरेपछि सुरेश मण्डललाई नगरप्रमुख बेचन दासका मान्छेहरुले घरबाटै अपहरण गरेको र ज्यान मार्ने गरी कुटपीट गरेको आरोप लगाए । सुरेश मण्डलले गत विहिबार जनकपुरधामस्थित मण्डल केवट सेवा आश्रमको बैठकमा नगरप्रमुख बेचन दास र प्रमुख सचेतक लखन दासलाई नामै किटान गरी गाली गलौज नगरेको उनले बताए ।
उनले भने, ‘सुरेश मण्डलले जाति उत्थान, विकास तथा संगठन मजबुत बनाउने सम्बन्धमा आफ्नो धारणा राखेको र सो कुरालाई नकारात्मकरुपमा नगर प्रमुख बेचन दास तथा प्रमुख सचेतक लखन दासले लिएकाले नगरप्रमुखका छोरा भजन दासले १०÷१५ जना समुहमा उनलाई बफै र लवटोलीको बीचमा पर्ने भुतही गाछीमा अपहरणशैलीमा कुटपीट गरी सख्त घाइते बनाएको छ ।’ उनको उपचार जनकपुरधाम स्थित रामजानकी होस्पिटलमा भइरहेको उनले बताए । त्यस्तै एमालेका कार्यकर्ताहरुले विदेह नगरपालिका वडा नम्बर ६ स्थित एकराही बस्ने प्रदिपकुमार मण्डललाई पनि घरमै पसेर मरनासन्न हुने गरी कुटपीट गरेको उनले बताए । सुरेश मण्डलको अपहरण गरी कुटपीट गर्नु अघि एमालेका कार्यकर्ताहरुले सार्वजनिकरुपमा गालीगलौज गरेको भन्दै उनलाई स्थानीय प्रहरी चौकीमा बुझाउन खोज्दा झडप भएको थियो ।
यसैबीच नगरप्रमुख बेचन दास र प्रदेश सांसद लखन दास पक्षले समेत पत्रकार सम्मेलन गरी सुरेशले जनमतको कार्यकर्ता हुँ भन्दै आफूलाई पटक पटक गाली गलौज आएको आरोप लगाएका छन । उनीहरुले भने सुरेश पक्षको आक्रमणबाट आफ्ना तीन जना मान्छे समेत घाइते भएको छ ।
यो विषयमा आफ्नो प्रतिक्रिया दिनुहोस् !