जनकपुरधाम, असोज २९ गते । जनकपुरधामस्थित हुलाक कार्यालय धनुषाका कर्मचारीहरुले दशैं जस्ता चाडपर्वमा पनि तलब नखुवाएको भन्दै कामकाज ठप्प गरेर आन्दोलनमा उत्रेका छन् । सोमवार कर्मचारीहरुले दशैं, चाड तिहारको समयमा पनि गत ३ महिनाको तलब नदिएको भन्दै कामकाज ठप्प गर्दै कार्यालय परिसरमा धर्ना समेत दिएका छन् ।
केही दिनअघि अर्थमन्त्रालयले महालेखा नियन्त्रक कार्यालयलाई दशैं तिहार जस्ता चाडपर्वमा कुनैपनि कर्मचारीको तलब नरोक्नु भनेर पत्राचार नै गरेको थियो । तर हुलाक कार्यालय धनुषामा रकम भएपनि मनपर्दी गर्दै कार्यालय प्रमुखले तीन महिनादेखि तलब खुवाएको छैन ।
कर्मचारीहरुले कार्यालय प्रमुख जयचन्द्र साहले मनमानी गर्दै आफ्नो सुख सुविधामा लागेर दशैं जस्ता पर्वमा पनि तीन महिनादेखि आफूहरुलाई तलब भत्ता नदिएको आरोप लगाउंदै निकै समस्या परेको दुखेको पोखेका छन् । कर्मचारीहरु र कार्यालय प्रमुख साहबीच जिन्सी शाखाबाट लिएको सामान बुझिलिएको भन्ने हस्ताक्षर गरिदिन र तलबका लागि दिनभरि विवादले अवस्था तनावग्रस्त बनेको थियो ।
जिन्सी शाखाका जितेन्द्रलाल कर्णले भने भदौ महिनादेखि दशैं भत्ता समेत गरी तीन महिनाको कर्मचारीहरुको तलब भत्ता बक्यौता रहेको छ । पटक पटक ताकेता गर्दा बेवास्ता गर्दै आएपछि कामकाज ठप्प पारेर आन्दोलनमा उत्रिनु परेको उनले बताए । कर्णले थप्दै भने कार्यालय प्रमुख साहले कार्यालयबाट सामान बुझेर सामान बुझेका भनी हस्ताक्षर नगरी आलटाल गर्दै आएको छ । कहिले फ्रिज त कहिले एसी आफ्नो क्वार्टरमा लगाई दिन जिन्सी शाखामा दबाव दिदै आएको छ ।
अर्का एक कर्मचारीले दशैं, तिहार जस्ता चाडपर्वमा आफूहरुको तलब नदिइएपछि निकै समस्यामा परेको दुखेसो सुनाए । कार्यालय प्रमुख साहले कर्मचारीहरुसँग १०÷१० हजार रुपैया कमीशन माँग्नुका साथै नदिएमा स्थायी कर्मचारी निलम्बन गरिदिने, करारका कर्मचारीलाई जागिरबाट हटाइ दिने लगायतका धाकधम्की दिदैं आएको आरोप समेत उनले लगाए ।
यता कार्यालय प्रमुख साहले संचारकर्मीहरुले प्रतिक्रिया लिन खोज्दा उनी भाग्न खोजिरहेको थियो । तर संचारकर्मीहरुले पन्च्याउंदै जाँदा उनले शुरुमा लेखापाल नरहेको भनी पन्छिन खोज्दा आन्दोलनरत कर्मचारीहरुले कोलेनिकाबाट नयाँ लेखापाल काजमा खटाएको भनेपछि अन्ततः उनले लेखापालले काम नगरेको कारण तलब नखुवाएको बताए । दशैं जस्ता पर्वमा तलब नदिनु कतिको जायज हो जिज्ञासामा उनले कर्मचारी मात्र होइन पत्रपत्रिकाको समेत भुक्तानी बांकी रहेकाले एकैचोटी व्यवस्थापन गर्ने गैरजिम्मेवार जवाफ दिए । तलब खुवाउन कमीशन माग्ने गरेको कर्मचारीहरुको आरोप बारे प्रमुख साहले आफूले कसैसँग तलब वापत कमीशन नमाँगेको भने ।
कर्मचारीहरुले जनाए अनुसार लेखापाल सरुवा भएपछि केही दिन अघि कोलनिकाबाट विकू मण्डल लेखापालको रुपमा पठाइयो । तर उहाँलाई प्रमुख साहले बजेट शिर्षकमा नै नभएका सामानहरु आफ्नो क्वार्टरमा लगाउन र मोबाइल रिचार्ज लगायतका लागि रकम माग्न थालेपछि लेखापाल मण्डल कार्यालय आउन छाडेको छ । कार्यालय प्रमुख साह र लेखापाल मण्डलबीचको विवादले कर्मचारीहरु तलब खानबाट वञ्चित भएको हो । प्रमुख साह कार्यालयमा आएदेखि कर्मचारीहरु तलब पाएका छैनन् ।
लेखापाल मण्डलले भने आफूलाई कोलेनिकाले मात्र तलब खुवाउन हुलाकमा पठाएको थियो । त्यहाँ जाँदा करार कर्मचारीको समेत हाजिरी रुजु भएपछि मात्र सबैको तलब खुवाउने भनी रोकेको राखेको थियो । पटक पटक आग्रह गर्दा पनि तलब अभिलेखमा सदर नगर्दा तलब खुवाउन सकेन । यति मात्र होइन कार्यालय प्रमुख साहले मोबाइल रिचार्ज रकम र फ्रिज लगायतको माग गर्न थालेपछि आफूले कर्मचारीको तलब खुवाउन मात्र आएको भनेपछि आफूसँग कार्यालयमै दुव्र्यवहार शैलीमा उत्रेका थियो ।
यसैबीच दिउंसो २/३ बजेतिर जिल्ला प्रशासन कार्यालयको प्रयासले कोलेनिको रोहबरमा स्थायी र करार दुवै कर्मचारीको तलब अभिलेखमा प्रमुख साहसँग सदर गराई भुक्तानीका लागि कोलेनिकामा पठाएपछि कर्मचारीहरु काममा फर्केका छन् । हुलाक कार्यालय धनुषामा स्थायी, करार र इकाई कार्यालय सहितका गरी करीब तीन सय कर्मचारीको तलब बाँकी थियो ।
यो विषयमा आफ्नो प्रतिक्रिया दिनुहोस् !