जनकपुरधाम, भदौ २६ । सफाईकर्मी नभए हाम्रो गाउँ–ठाउँ कस्तो हुन्छ ? हामीले प्रयोग गर्ने शौचालयदेखि सडक तथा अस्पतालदेखि मठमन्दिरका फोहर संकलन तथा व्यवस्थापन गर्ने सफाईकर्मीहरुलाई हेर्ने सामाजिक दृष्टिकोण कस्तो छ ? समाजलाई सफा सुग्धर तथा वातावरणलाई स्वच्छ राख्न दिनरात खटने सफाईकर्मी स्वयं कतिको जोखिममा छ ?
यी यावत सबालहरुलाई उजागर गर्न तथा सफाईकर्मीहरुको सुरक्षा एवं तिनीहरुलाई मर्यादित बनाउन जनकपुरधाम उपमहानगरको सहकार्यमा नेपाल विकास समाज नामक संस्थाले सरसफाइकर्मीहरुका लागी ‘ स्वास्थ्य, सुरक्षा, स्वच्छता र संक्रमण रोकथाम तथा नियन्त्रण ’ सम्वन्धी तीन दिने तालिम सम्पन्न गरेको छ ।
शनिवारदेखि सोमवारसम्म संचालित उक्त तालिममा जनकपुरधाम उपमहानगर पालिकाका मेयर मनोज साह, सफाई युनिटका कर्मचारी, वातावरणविदसंगै नेपाल विकास समाजकी गीता साह लगायतले सफाईकर्मीहरुलाई पेसागत मर्यादा तथा सुरक्षाबारे प्रशिक्षार्थीहरुलाई जानकारी गराएका थिए । तालिममा सफाईकर्मीहरुसंगै सौचालय सफाई गर्ने पेसाकर्मीहरु, अनौपचारिक कामदार, निजि क्षेत्रका सफाइकर्मीहरु, सफाइमा प्रयोग हुने गाडीका चालक समेतको सहभागिता रहेको थियो ।
सो तालिममा फोहर स्वच्छता र पेशाजन्य स्वास्थ्य, सर्ने रोग र पेशाजन्य स्वास्थ्य जोखिम तथा संक्रमण रोकथाम प्रक्रिया, हात धुने तरिका र यसबाट हुने फायदा, व्यक्तिगत सुरक्षा सामाग्री (पिपिई) को प्रयोग विधि, महत्व र यस्को सफाइ/निर्मलीकरण, सफाईकर्मीका निमित्त सान्दर्भिक कानुन, नियम र प्रावधानहरु जस्ता विषयमा प्रस्तुतीकरण, खेल अभ्यास र समूह कार्य तथा छलफल विधि मार्फत प्रशिक्षण गराइएको थियो ।
एशियाली विकास बैंकको सहयोग तथा जनकपुरधाम उपमहानगर पालिकाको सहकार्यमा नेपाल विकास समाज नामक गैर सरकारी संस्थाले उक्त कार्यक्रम आयोजना गरिएको र उपमहानगरले सहकार्यमा नेपाल विकास समाज परियोजना समेत संचालन गर्न लागेको जनकपुरधाम उपमहानगरपालिकाका प्रवक्ता प्रमेश झाले जानकारी दिएका छन् ।
यो विषयमा आफ्नो प्रतिक्रिया दिनुहोस् !