जनकपुरधाम, भदौ २४ । विदेह नगरपालिकाका मेयर बेचन दासले बजार लगाउन एक मन्दिर भत्काउन घटना बाहिरिएको छ । मन्दिरको छेउमै रहेको पोखरी समेत बजार विस्तारकै लागि पुर्न थालेका छन ।
विदेह नगरपालिका वडा ननम्बर ७ तिनकौरिया चोकस्थित गिद्धा बेलापट्टी माध्यमिक विद्यालयको जग्गामा रहेको रामजानकी मन्दिर भत्काएर र पाेखरी पुरेर माछा बजार सहित सटर बनाउन लागेकाृमा पूजारीले आक्रोश व्यक्त गरेका छन् । पोखरी पुर्न मन्दिरकै माटो ५ फिटसम्म कटान गरिएकाे देखेसाे पुजारीले सुनाए ।
करीब ७० वर्षअघि डेढ कट्ठामा निर्माण गरिएको सो मन्दिर पोखरीको दक्षिणी डीलमा रहेको छ । मन्दिरका पूजारी राजकिशोर दासले बजार विस्तारको नाउँमा रामजानकी मन्दिरलाई भत्काइएकाे छ । तर पोखरीको डिलमा विभिन्न व्यक्तिले अतिक्रमण गरेकाेमा तिनीहरुलाई केही भनिएकाे छैन ।
आफूले मेयर बेचन दास कहाँ कुरा राख्दा रामचन्द्र साह भन्ने व्यक्तिको निजी जग्गा परेको हुनाले मन्दिर भत्काइरहेको भनी हप्काउने गरेको छ । जबकि रामचन्द्र साहको जग्गा मन्दिर परिसरमा मुश्किलले ५ फिट अर्थात एक धुरको हाराहारीमा परेको छ, आफूले सो जग्गा छोडिपनि सकेको छ । तरपनि मन्दिरको जग्गामा माछा बजार लगाउन मनसायले भत्काइरहेको छ । मेयर दासकाे आदेशमा मन्दिरको पूजाघर बाहेक सबै घर संरचना भत्काइ र फलफूलका बगौचा कटान गरिसकिएकाे छ ।
घटना सम्बन्धमा जिल्ला प्रशासन कार्यालयमा उजुरी दिन जांदा स्थानीय तह आफू मातहत नरहेकाे भन्दै स्थानीयस्तरमा विवाद समाधान गर्नु भनेर फर्काइदिएकाे गुनासाे समेत उनले गरे ।
यता नगरप्रमुख बेचन दासले पनि मन्दिरकाे संरचना भत्काएकाे स्वीकार गरेका छन् । उनले मन्दिर ध्वस्त पार्ने मानसिकता नराखेको दावी गरे बजार विस्तार र मन्दिर पुनः निर्माणका लागि मन्दिर भत्काउने र पाेखरी पुर्ने काम भइरहेकाे भने ।
उनले गिद्धा बेलापट्टी विद्यालयको चर्चा देशैभरी चलिरहेको समयमा सो विद्यालयका लागि आयश्रोतको श्रृजना गर्नका लागि यो कदम उठाइएको बताए । उनले सो स्थानमा ३ सयभन्दा बढी सटर निर्माण गर्ने लक्ष्य रहेको जानकारी दिए । पहिलो चरणमा ९० वटा सटर निर्माण गरिने छ । सटर निर्माणसंगै अव्यवस्थित बजार विस्तार हुने विश्वास व्यक्त गरे ।
यो विषयमा आफ्नो प्रतिक्रिया दिनुहोस् !