जनकपुरधाम, साउन ११ गते । जनकपुरधाम उपमहानगरपालिका वडा नम्बर २० देवपुरा रुपैठामा रहेको तेलिया पोखरीको विवाद समाधानका लागि गरिएको सम्झौता कार्यान्वयन गर्न माग गरिएको छ ।
पोखरी घाटमा पर्वत्योहार मनाउने र अतिक्रमण गरिएका घाट खाली गराउने बारे स्थानीय हिन्दु र मुस्लिम समुदायबीच विवाद हुँदै आएको छ ।
सोही विवाद समाधानका लागि २०७८ कात्तिक २९ गतेका दिन उपमहानगरपालिकाका तात्कालिन नगरप्रमुख लालकिशोर साह, उपप्रमुख रिता मिश्र, प्रमुख जिल्ला अधिकारी, नेपाल प्रहरी तथा सशस्त्र प्रहरीको प्रतिनिधिको रोहबरमा सौहाद्रपूर्ण वातावरण र दूबै पक्षबीच एक आपसमा आपसी सामान्यजस्ता कायम गर्न प्रतिबद्धता सहित दुवै पक्षबीच सम्झौता भएको थियो ।
तात्कालिन सहायक प्रमुख जिल्ला अधिकारी दिपक कर्णद्वारा हस्ताक्षरित सो सम्झौता पत्रमा उक्त पोखरी सार्वजनिक भएका कारण त्यसको स्वामित्व र संरक्षण उपमहानगपालिकाले गर्ने, हिन्दुको छठ र मुस्लिमको दाहा जस्ता पर्वमा सुरक्षा नियकालाई पूर्व जानकारी दिई पोखरीमा थप माटो नझारी मनाउने लगायतका ६ बुँदे सम्झौता भएको थियो ।
यस्तै दुवै समुदायले एक अर्काको धर्म÷कर्म÷रितिरिवाज परम्पराको उच्च सम्मान गर्ने, पोखरीमा झण्डा लगायतका कुनैपनि संकेत चिन्ह नराख्ने । हाल राखिएको झण्डा त्यहाँबाट सम्बन्धित पक्षले व्यवस्थापन गर्ने, दुबै पक्ष मध्ये कसैले पनि मिडिया, सामाजिक सञ्जाल वा अन्य कुनै माध्यमबाट धार्मिक÷साम्प्रादायिक सद्भाव बिगार्ने गरी भनाई वा विचार नराख्ने र विवाद समाधान सहित साम्प्रदायिक सद्भाव कायम गर्न तथा विकास निर्माणका लागि दुवै पक्षबाट ४/४ रहने गरी ९ सदस्यीय समिति गठन गर्ने समेत सम्झौता भएको थियो ।
समितिका सदस्य रहने तोकिएका प्रतिनिधि उमेश दासले बिहिवार एक पत्रकार सम्मेलन गरी भने सम्झौताको दुई वर्ष बितिसक्दा पनि ६ बुँदे मध्ये एउटापनि बुँदा सम्बन्धित निकायको बेवास्ताको कारण कार्यान्वयन हुन नसकेको गुनासो गरे ।
उनले भने सम्झौता कार्यान्वयन नभएपछि गएको वर्ष २०७९ साउन महिनामा प्रमुख जिल्ला अधिकारी समक्ष लिखित रुपमै ताकेता गरियौं तर कार्यान्वयन भएन । त्यसपछि २०७८ साउन ८ गते उपमहानगरपालिका नगर प्रमुख मनोज साहलाई सम्झौता कार्यान्वयन गराउन लिखित रुपमा भनेका छौं ।
यो विषयमा आफ्नो प्रतिक्रिया दिनुहोस् !