जनकपुरधाम, साउन २ गते । हुलाकी राजमार्ग योजना कार्यालय जनकपुरधामले पछिल्लो वर्षमा लक्ष्यभन्दा बढी सडक निर्माण गर्न सफल भएका छन् ।
आर्थिक वर्ष २०७९/०८० मा सो कार्यालय ५२ किलोमीटर कालोपत्रे सडक निर्माण गर्ने लक्ष्य लिएकोमा धनुषा, महोत्तरी, सिरहा र सर्लाही सहितका कार्यक्षेत्रमा ६५ किलोमीटर सडक कालोपत्रे निर्माण गरेका हुन् ।
हुलाकी राजमार्ग योजना कार्यालय जनकपुरधामले पछिल्लो आर्थिक वर्षमा ७ वटा पुल निर्माण गर्ने लक्ष्य लिएकोमा ५ वटाको निर्माण कार्य मात्र सम्पन्न गर्न पाएका छन् । सिरहाका गल्छुधार, कल्याणदह, गागन, सहदा, महोत्तरीका पिपरा कटान, सर्लाहीका गडहिया सहितका पुल निर्माण कार्य सम्पन्न गर्ने लक्ष्य लिएको थियो ।
जसमध्ये सिरहाका गागन र सहदा पुल निर्माण कार्य अधुरो रहेको जनाइएको छ । निर्माण कार्य अधुरो रहेपनि अन्तिम चरणमा रहेको छ चालु आर्थिक वर्षमा गरिसक्ने कार्यालयले दाबी गरेका छन् ।
हुलाकी राजमार्ग योजना कार्यालय जनकपुरधामका प्रमुख कृष्णकुमार महतोले भने हामीले पछिल्लो आर्थिक वर्षमा करीब करीब शतप्रतिशत कार्यक्रम सम्पन्न गर्न भ्याएका छौं । उनले भने ‘सडक कालोपत्रे गर्ने लक्ष्य भन्दा १३ किलोमीटर बढी नै गरेका छौं र ७ वटा पुल मध्ये २ वटाको निर्माण कार्य सम्पन्न गर्न नसकेपनि अन्तिम चरणमा रहेको छ ।
उनका अनुसार यी कार्यालय मातहतमा १८ वटा पुल र ५६ किलोमीटर कालोपत्रे सडक निर्माण बांकी रहेको छ । जसमध्ये चालू आर्थिक वर्ष २०८०/०८१ मा २५ किलोमीटर कालोपत्रे सडक र दूईवटा बांकी रहेको पुल सहित ५ वटा पुल निर्माण गर्ने लक्ष्य रहेको छ । चालु आ.ब. का लागि ४५ करोड रुपैया विनियोजित गरिएको छ । यसवर्ष धनुषामा कमला क्षेत्रको यदुकोहा रुटको १० किलोमीटर, सिरहाको गोलबजार लगडी गडियाहीसम्म २८ किलोमीटरमा १५ किलोमीटर सडक निर्माण गरिनेछ ।
यी कार्यालय अन्तर्गत कार्यक्षेत्र धनुषा, महोत्तरी, सिरहा र सर्लाहीमा प्रस्तावित योजनाहरु सम्पन्न गर्न करीब ४ अर्बको आवश्यकता रहेकोमा बहुवर्षिय योजना रहेकाले चालु आर्थिक वर्षमा ४५ करोड रुपैया विनियोजन गरिएको प्रमुख महतोले बताए । सिरहा र धनुषा जोड्ने भांसिएको कमला पुलको निर्माण कार्य यसै आ.ब.मा सम्पन्न गर्ने लक्ष्य सहित असोज महिनादेखि शुरु गरिने उनले जानकारी दिए ।
यो विषयमा आफ्नो प्रतिक्रिया दिनुहोस् !