जनकपुरधाम, १० असार । बजेट भाषणबाट सरकारले आलु र प्याज सहितका तरकारीमा लगाएको मूल्य अभिवृद्धि करको विरोधमा जनकपुरधामका आलूप्याज व्यवसायीहरु आन्दोलनमा उत्रेका छन् ।
सरकारले बढाएको १३ प्रतिशत कर फिर्ताको माग गर्दै आइतवारदेखि आलू प्याज व्यवसायीहरु विक्री वितरण ठप्प गरी आन्दोलनमा उत्रेका हुन । भारतबाट आयात हुँदै आएको आलु र प्याज यसअघि नै जेठ १८ गतेपछि आयात रोकेका छन् ।
सरकारले कर बढाएपछि महँगो हुन गएपछि स्थानीय उपभोक्ताहरु भारतीय सीमावर्ती क्षेत्रबाट किनमेल गर्ने गरेको कारण आफूहरुको विक्री वितरण कम हुन गएपछि आफूहरुलाई आन्दोलनमा उत्रिनु परेको आलु प्याज व्यवसाय संघ जनकपुरधामका अध्यक्ष अलाउद्दिन राईनले बताए ।
सरकारले भ्याट लगाएपछि व्यापार गर्न कठिनाइ भइरहेको बताउँदै उनले प्याजमा प्रतिकिलो १३ र आलुमा प्रतिकिलो ८ रूपैयाँ भन्सार तिर्नु पर्दा महँगो हुने भएकाले उपभोक्ताहरु सीमापारी जाने गरेको विक्री वितरण कम हुँदा गोदाममै सर्ने गरेको कारण आयात रोकिएको उनले बताए ।
करलाई कारण देखाएर व्यवसायीले आयात रोकेर विक्री वितरण नै ठप्प गरेपछि जनकपुरधाम बजार क्षेत्रमा आलूप्याज महँगिन गएको छ । हाल बजारमा आलूप्याजको मूल्य बढेको बारे उनले भने एकातर्फ कर र अर्कोतर्फ गोदाममै सर्ने गरेको कारण मूल्य बढन गएको राईन भने ।
अहिले जनकपुरधामको पेठियास्थित तरकारी बजारबाट भारतीय आलु प्याज बिक्री भइरहेपनि यो यसअघि नै आयात भएर बसेको स्टक मात्रै रहेको र नयाँ आलु प्याजको आयात ठप्प रहेकोले बिक्री वितरण बन्द गरिएको उनको भनाई छ ।
‘बजेटपछि जेठ १६, १७ र १८ गते भारतबाट प्याज आएको थियो, तर त्यसपछि आयात शून्य छ’ राईनले भने, ‘प्याजको कारोबार नै छैन, त्यही भएर मूल्यसूची पनि राख्न छाडेका छौँ ।’ अब प्याज आउँछ की आउँदैन भन्ने अन्यौल रहेको उनले भने ।
‘बाहिर महँगो भइसक्यो भन्ने सुनिएको छ, तर प्याजको कारोबार यहाँबाट शून्यमा झरेको छ’ राईनले थपे, ‘बाहिर अहिले बिक्री भइरहेको प्याज पनि यहीबाट केही दिन अघिसम्म गएको स्टक हो, त्यो सकिएपछि बाहिर पनि नपाउने अवस्था आउन सक्छ ।’
ग्राहकहरू सिमानाकास्थित भारतीय बजार जान थालेपछि व्यापार चौपट भएको र यहाँका व्यापारीहरू लाखौंको घाटामा गएको बताउंदै राईन कर फिर्ता सहित सीमामा पूर्ण रुपमा बन्देज लगाउनु पर्ने समेत गरेका छन् । यसैबीच बजारमा आलु प्याजको अभाव हुँदै गएको छ भने अन्य तरकारीको पनि भाउ बढेको छ ।
अर्थमन्त्री डा प्रकाशशरण महतले आगामी आर्थिक वर्षको बजेटमार्फत तरकारी तथा फलफूलसहित १७० वस्तुको आयातमा मूल्य अभिवृद्धि कर लगाउने घोषणा गरेका हुन् । जेठ १५ गते बजेट प्रस्तुत भएपछि जेठ १६ गतेबाटै यो निर्णय लागू भएको हो । जनकपुरधाम बजारमा १७ वटा थोक बिक्रेतामार्फत दैनिक १५० टन आलु प्याज बिक्री हुँदै आएको थियो ।
यो विषयमा आफ्नो प्रतिक्रिया दिनुहोस् !