जनकपुरधाम, १४ फागुन । आर्थिक चलखेलमा र नातेदारलाई कर्मचारीमा भर्ना गरेको भन्दै धनुषाको लक्ष्मीनियाँ गाउँपालिकाका वडाध्यक्षहरुले प्रमुख प्रशासकीय अधिकृतको कार्यकक्षमा तालाबन्दी गरेका छन् ।
कार्यपालिका बोर्ड बैठकबाट खुल्ला प्रतिष्पर्धाले कर्मचारी भर्ना गर्ने भएको निर्णय विपरित गाउँपालिका अध्यक्ष भोगेन्द्र मिश्र र प्रमुख प्रशासकीय अधिकृत नागेन्द्र यादव मिलेर करारका कर्मचारी नहटाई खुला प्रतिस्पर्धा बिना नै आर्थिक चलखेल गरी आफ्नो नातागोताका मान्छेलाई भर्ना गरेको आरोप लगाउंदै उनीहरुले तालाबन्दी गरेका हुन ।
प्रमुख प्रशासकीय अधिकृत नागेन्द्र यादवको कार्यकक्षमा वडा नम्बर १ का वडाध्यक्ष दिलिप यादव, वडा नम्बर–५ का वडाध्यक्ष दुखरण यादव, वडा नम्बर–६ का वडाध्यक्ष महाविर साह र वडा नम्बर–७ का वडाध्यक्ष गंगा साहले तालाबन्दी गरेका हुन् ।
वडा नम्बर १ का अध्यक्ष दिलिप यादवले रोजगार सहायक, एमआईएस अपरेटर लगायतका पदका लागि दरखास्त आह्वान गरिएपनि नतिजा प्रकाशन नै नगरी गाउँपालिका अध्यक्ष मिश्र र प्रमुख प्रशासकीय अधिकृत यादवले आर्थिक चलखेल गरी नातागोताका मान्छेलाई भर्ना गरेको कारण तालाबन्दी गरिएको बताए ।
यो विषयमा आफ्नो प्रतिक्रिया दिनुहोस् !