जनकपुरधाम, कात्तिक ८ गते । तराई मधेश लोकतान्त्रिक पार्टी (तमलोपा) का वरिष्ठ नेता एवं महोत्तरी क्षेत्र नम्बर २ बाट प्रतिनिधि सभाका उम्मेदवार डा. विजयकुमार सिंह अब राजनीतिकका लागि होइन विकासका निम्ति मतको प्रयोग गर्न आग्रह गरेका छन ।
चुनावी प्रचार प्रसारको क्रममा महोत्तरी क्षेत्र नं. २ स्थित मरईमा आयोजित लक्ष्मी पूजनोत्सव कार्यक्रममा सहभागी एवं स्थानीय समाजिक अगुवा नेता कार्यकर्ताहरुसँगको भेटघाटमा पटक पटक यस क्षेत्रबाट जितेका शरतसिंह भण्डारी कयौं पटक मन्त्री बनेपनि विकास हुन नसकेको गुनासोमा डा. सिंहले यस्तो आग्रह गरेका हुन ।
डा. सिंहले भने यो क्षेत्र कांग्रेसीहरुको ठूला हस्तीहरुको क्षेत्र रहेको कारण यस क्षेत्रबाट पटक पटक कांग्रेस र स्वतन्त्रबाट समेत जितेकाहरु मन्त्री समेत भए तर विकास हुन नसक्नुको प्रमुख कारण हामी जनताले मतको सही प्रयोग गर्न नसक्नु हो । एउटै व्यक्तिलाई पटक पटक जिताएमा त्यसले विकास होइन विकासको नाममा रकम कमाउने उद्देश्य मात्र राखेका हुन्छन । त्यसैले आउंदो चुनावमा ठूला राजनीतिक अनुहार वा दल नहेरी व्यक्ति हेरेर मात्र मत दिनु, त्यसका लागि मधेशीलाई पहिचान सहितको अधिकार सम्पन्न बनाउने र विकास गर्न सक्ने तमलोपा उत्तम विकल्प रहेको आग्रह गरे ।
उनले भने यहाँबाट जितेका नेता यस क्षेत्रको के अवस्था छ भन्ने हेर्न चुनाव बाहेक कहिले पनि फर्केर आउंदैनन् तर पेशाले एउटा चिकित्सक भएपनि आफ्नो गाउँठाउँको मायाले गर्दा समयमा आउने गरेको छु र यहाँको विकासका निम्ति स्थानीयसँग भलाकुसारी गर्दै आएको छु ।
डा. सिंहले आफू संविधान सभा सदस्य भएको बेला यस क्षेत्रमा सकेसम्म विकास गरेको कुरा कसैसँग लुकेको छैन । यहाँका सडकदेखि मन्दिर, सामाजिक दलान र विद्यालय तथा स्वास्थ्य चौकीहरुमा समेत विकास गरेको कुरा सर्वविदितै छ । अब मूल्यांकन गर्ने पालो यहाँका जनताको हातमा छ ।
सो कार्यक्रममा विभिन्न दलसँग आबद्ध स्थानीय सामाजिक अगुवा नेता कार्यकर्ताहरु डा. सिंहलाई आउंदो निर्वाचनमा यस क्षेत्रलाई राजनीतिक खेलको रुपमा प्रयोग गर्ने नेतालाई तह लगाई विकास र पहिचानको निम्ति काम गर्ने नेता डा. सिहको पक्षमा लाग्ने प्रतिबद्धता जनाएका थिए ।
यो विषयमा आफ्नो प्रतिक्रिया दिनुहोस् !