जनकपुरधाम, असोज २८ गते । संघीय सरकारबाट कांग्रेस नेतृत्वको प्रधानमन्त्री शेरबहादुर देउवाले गठबन्धन आबद्ध जनता समाजवादी पार्टीका मन्त्रीहरुलाई सरकारबाट हटाएको झोंकमा मधेश प्रदेश सरकारबाट पनि कांग्रेसका मन्त्रीहरुलाई हटाइएको छ ।
मुख्यमन्त्री लालबाबु राउतले मधेश सरकारबाट कांग्रेस आबद्ध दलका मन्त्रीहरुलाई मात्र हटाएका छन । संघीय सरकारबाट प्रधानमन्त्री शेरबहादुर देउवाले गठबन्धनमा जनता समाजवादी पार्टीका चारजना मन्त्रीलाई हटाएको २४ घण्टा नबित्दै जसपा नेतृत्वको मधेश सरकारबाट पनि जसपा नेतृत्वको मुख्यमन्त्री लालबाबु राउतले कांग्रेस आबद्ध तीन जना मन्त्रीहरुलाई हटाउन प्रदेश प्रमुखलाई सिफारिस गरेको हो ।
कांग्रेसबाट मन्त्री बनेकाहरुलाई भौतिक पुर्वाधार विकास मन्त्री रामसरोज यादव, महिला बालबालिका युवा तथा खेलकुद मन्त्री विरेन्द्र सिंह र खानेपानी तथा उर्जा विकास मन्त्री ओमप्रकाश शर्मालाई पदमुक्त गर्न प्रदेश प्रमुखलाई लिखित रुपमा सिफारिस गरेका थिए ।
मुख्यमन्त्री राउतको सिफारिसमा मन्त्रीहरुलाई पदमुक्त गरिएको बारे प्रदेश प्रमुख कार्यालयका प्रवक्ता शत्रुधन यादवले एक विज्ञप्ति जारी गरी जनाएको छ । प्रदेश प्रमुख कार्यालयबाट जारी विज्ञप्तिमा मुख्यमन्त्री राउले नेपालको संविधानको धारा १६९ को उपधारा २ को खण्ड ख बमोजिम पदमुक्त गर्न गरिएको सिफारिस अनुसार तिनीहरुलाई पदमुक्त गरी ती मन्त्रालयहरुको जिम्मेवारी मुख्यमन्त्रीले सम्हाल्ने तोकिएको जनाइएको छ ।
गठबन्धनमा रहेर प्रतिपक्षी दल एमालेसँग चुनावी तालमेल गरेका भन्दै गठबन्धन आबद्ध जनता समाजवादी पार्टीका चार जना मन्त्रीलाई हटाएपछि मधेश सरकारबाट कांग्रेसबाट हटाउने बिहीवार नै मुख्यमन्त्रीले मनसाय बनाइ सकेका थिए । तर पनि उनले आज बिहान ११ बजेसम्मको समय स्वेच्छाले राजीनामा दिनका लागि दिएका थिए । तिनीहरुले राजीनामा नदिएपछि करीब १२ बजेतिर तिनीहरुलाई हटाउन सिफारिस गरेको थियो ।
गठबन्धन दलका कांग्रेसका मन्त्रीहरुलाई हटाएपनि प्रदेश सरकारमा गठबन्धनमा रहेका नेकपा मओवादी केन्द्र र नेकपा एकीकृत समाजवादीबाट मन्त्रीहरु यथावत नै रहेका छन । मुख्यमन्त्री राउतले बिहीवार सांझ नै कांग्रेसका मन्त्रीहरुलाई फोन गरेर हामी अहिलेसम्म सौहार्दपुर्ण अवस्थामा थियौं, तपाईको पार्टीले संघीय सरकारबाट आफ्नो पार्टीका मन्त्रीहरुलाई हटाइ दिएको छ । यस्तो अवस्थामा तपाईहरु पनि स्वेच्छाले राजीनामा दिइ दिनुप¥यो, नत्र बाध्यतावश हटाउनुपर्नेछ फोन गरेर सुझाव दिएका थिए । जसको पुष्टि कांग्रेसका मन्त्री एवं दलका नेता रामसरोज यादवले गरेका थिए ।
मुख्यमन्त्रीको सुझाव प्रति मन्त्री यादवले हामीले केन्द्रिय अध्यक्ष एवं प्रधानमन्त्री शेरबहादुर देउवासंग कुरा गर्दा राजीनामा नदिनुस भनेका थिए । सो निर्देशन अनुसार हामीले राजीनामा नदिएपछि आफूहरुलाई हटाइएको मन्त्री यादवले बताएका छन । उता मुख्यमन्त्री राउतले गठबन्धन अनुसार संघ र प्रदेशमा पनि सरकार गठन भएको थियो । अरु दलसँग चुनाव तालमेल गरेको आवेशमा हाम्रो पार्टीको मन्त्रीहरुलाई हटाएपछि उनीहरुले आफै स्वेच्छाले राजीनामा दिनुपर्ने थियो । तर उहाँहरुले राजीनामा नदिएपछि बाध्य भएर हटाउनु परेको बताए ।
यो विषयमा आफ्नो प्रतिक्रिया दिनुहोस् !