जनकपुरधाम, असोज २३ गते । सत्ता र प्रतिपक्षी दलहरु गठबन्धन बनाएर निर्वाचनमा होमिएपछि नवगठित तराई मधेश लोकतान्त्रिक पार्टी (तमलोपा) ले पनि गठबन्धनलाई टक्कर दिन चुनावी मैदानमा उत्रेका छन ।
सत्ता गठबन्धनका चुनावी घटक दल लोकतान्त्रिक समाजवादी पार्टी (लोसपा) नेपाल नेताहरुले दिएको निर्वाचन क्षेत्रमा लोसपाबाट फुटेर बनेका तमलोपाका नेताहरुले उम्मेदवारी दिएका छन ।
लोसपा अध्यक्ष ठाकुरले महोत्तरी क्षेत्र नम्बर–३ मा दिएको उम्मेदवारी विरुद्ध तमलोपाका अध्यक्ष वृषेशचन्द्र लालले उम्मेदवारी दिएका छन् भने लोसपाका नेता शरतसिंह भण्डारीले उम्मेदवारी दिएको महोत्तरी क्षेत्र नम्बर २ मा तमलोपा वरिष्ठ नेता डा. विजयकुमार सिंहले उम्मेदवारी दिएका छन ।यसअघि २०७४ को निर्वाचनमा लोसपा अध्यक्ष ठाकुर महोत्तरी–३ र नेता भण्डारी महोत्तरी–२ बाट प्रतिनिधि सभा सदस्य बनेका थिए ।
प्रदेश सभातर्फ लोसपाबाट महोत्तरी ३(१)मा अभिराम शर्मा र ३(२) मा रानी शर्मा तिवारीले उम्मेदवारी दर्ता गराएका छन् भने तमलोपाबाट प्रदेश सभा २ (१) मा इद्रीश राईन र २ (२) मा रामकृपाल साहले उम्मेदवारी दिएका छन् ।
त्यस्तै, धनुषामा सत्ता गठबन्धनबाट लोसपाका नेता अनिल झा र प्रतिपक्षी एमालेको तर्फबाट जुली महतोले उम्मेदवारी दिएका धनुषा क्षेत्र नम्बर ३ मा तमलोपाका नेता असगर अलीले उम्मेदवारी दर्ता गराएका छन । धनुषा क्षेत्र नम्बर २ (ख) मा तमलोपाबाट श्यामसुन्दर साहले उम्मेदवारी दिएका छन ।
सत्ता गठबन्धनसँग चुनावी तालमेल गरेको लोसपाले सो क्षेत्रमा अध्यक्ष ठाकुरलाई उम्मेदवार बनाउने निर्णय गरेसँगै तमलोपाका अध्यक्ष लालले उनीबिरुद्ध उम्मेदवारी दिएका हुन ।पछिल्लो स्थानीय तहको निर्वाचनमा तमलोपाले महोत्तरी जिल्लाको महोत्तरी गाउँपालिका जितेका छन भने धनुषाको जनकपुरधाम उपमहानगरपालिका वडा नम्बर ३ मा जित पारिसकेका छन ।
यो विषयमा आफ्नो प्रतिक्रिया दिनुहोस् !