जनकपुरधाम, असोज २३ गते । आगामी मंसिर ४ गते हुने निर्वाचनका लागि देशभर सहित धनुषाका विभिन्न क्षेत्रमा पनि पुर्वमन्त्री देखि सांसदसम्म प्रतिनिधि सभा र प्रदेश सभाका लागि उम्मेदवारी दर्ता गराएका छन ।
धनुषाका प्रतिनिधि सभातर्फ ४ र प्रदेश सभातर्फ ८ निर्वाचन क्षेत्रमा सत्ता गठबन्धन र प्रतिपक्षी एमाले गठबन्धनको चुनावी तालमेल अनुसार उम्मेदवारहरुले सम्बन्धित निर्वाचन आयोग अधिकृतको कार्यालयमा विकासको पुरानै नारा लिएर उम्मेदवारी दर्ता गराएका हुन ।
क्षेत्र नम्बर ३ : मधेश प्रदेशका राजधानी समेत रहेका धनुषाको प्रभावशाली क्षेत्र निर्वाचन क्षेत्र नम्बर ३ मा प्रतिनिधि सभातर्फ सत्ता गठबन्धनबाट लोसपाका नेता एवं पुर्वमन्त्री अनिल झा र प्रतिपक्षी एमाले जसपा गठबन्धनबाट एमालेकी नेत्री एवं पुर्वमन्त्री जुली महतोले उम्मेदवारी दर्ता गराएका छन ।
सो क्षेत्रमा लोसपा वरिष्ठ नेता राजेन्द्र महतोले उम्मेदवारी दिने चर्चा थियो । तर गठबन्धनमा तालमेल शुरु हुन नसक्दा महतोको ठाउँमा झालाई उम्मेदवार बनाइएको थियो । प्रतिनिधि सभातर्फ झा यसअघिको निर्वाचन रौतहट–१ बाट विजयी भएका थिए । तर, यसपटक गठबन्धनभित्र रौतहट–१ नेकपा एकीकृत समाजवादीका अध्यक्ष माधवकुमार नेपालललाई दिने सहमति भएपछि नेता अनिल झा धनुषा–३ मा आएका हुन् ।
यी बाहेक स्वतन्त्रतर्फ पनि नेपाल पत्रकार महासंघ धनुषाका पुर्व अध्यक्ष उमेश साह, स्वतन्त्र महिला मिलनकुमारी साह लगायत केहीले उम्मेदवारी दिएका छन ।
प्रदेश सभातर्फ सत्ता गठबन्धनबाट ३ (क) मा कांग्रेसबाट प्रदेश भौतिक पुर्वाधार मन्त्री रामसरोज यादव र ३ (ख) मा लोसपाका प्रमुख सचेतक परमेश्वर साहले उम्मेदवारी दर्ता गराएका छन । त्यस्तै प्रतिपक्षी एमाले जसपा गठबन्धनबाट प्रदेशको ३ (क) मा जितेन्द्र यादव र ३ (ख) मा दिपेन्द्र ठाकुरले उम्मेदवारी दर्ता गराएका छन ।
सत्ता गठबन्धन र प्रतिपक्षी गठबन्धन दुवै दलबाट हजारौको संख्या दलबल सहित शक्ति प्रदर्शन गर्दै उम्मेदवारी दर्ता गराउन जनकपुरधाम स्थित निर्वाचन आयोगको कार्यालय महेन्द्रनारायण स्मृति प्रतिष्ठान पुगेका थिए ।
क्षेत्र नम्बर ४ : जिल्लाको अर्का प्रभावशाली क्षेत्र मानिएका क्षेत्र नम्बर ४ मा सत्ता गठबन्धन कांग्रेसबाट पार्टी सह महामन्त्री एवं पुर्व मन्त्री महेन्द्र यादव, एमालेबाट पार्टी सचिव एवं पुर्वमन्त्री रघुवीर महासेठ र जसपाबाट महाजन यादवले उम्मेदवारी दर्ता गराएका छन ।
प्रदेशतर्फ तर्फ ४ (क) मा सत्ता गठबन्धनबाट जसपा परित्याग गरी कांग्रेस छिरेका शेषनारायण यादव र एमालेबाट कांग्रेस परित्याग गरेका सन्तोष यादव तथा जसपाबाट प्रदेश पुर्व मन्त्री ज्ञानेन्द्र यादवले उम्मेदवारी दिएका छन भने ४ (ख) मा सत्ता गठबन्धनबाट नेकपा एकीकृत समाजवादी पार्टीका प्रदेश मन्त्री शत्रुधन महतो र एमाले जसपा गठबन्धनबाट एमालेका हरिनारायण महतोले उम्मेदवारी दिएका छन ।
क्षेत्र नम्बर १ : धनुषा क्षेत्र नम्बर ३ र ४ बाहेक क्षेत्र नम्बर १ मा प्रतिनिधिसभा तर्फ सत्ता गठबन्धनबाट एकीकृत माओवादी केन्द्रका नेता एवं पुर्वमन्त्री मातृका यादव, एमाले जसपा गठबन्धनबाट जसपाका दिपक कार्कीले उम्मेदवारी दर्ता गराएका छन । समाचार लेख्दासम्म उम्मेदवारी दर्ता जारी नै रहेकाले पुर्ण विवरण आउन सकेको छैन ।
क्षेत्र नम्बर २ : यस क्षेत्रमा सत्ता गठबन्धनबाट कांग्रेसका नेता एवं पुर्वमन्त्री रामकृष्ण यादव, एमाले जसपा गठबन्धनबाट मित्रवत प्रतिष्पर्धा हुने गरी एमालेबाट पुर्वमन्त्री उमाशंकर अरगरिया, जसपाबाट गंगाराम यादवले उम्मेदवारी दर्ता गराएका छन । यसबाहेक सत्ता गठबन्धनमा अटाउन नसकेका जिल्लाका प्रभावशाली नेता रामचन्द्र झा एकीकृत समाजवादी पार्टीबाट उम्मेदवारी दिएका छन ।
सो क्षेत्रको प्रदेश सभातर्फ २ (क) मा सत्ता गठबन्धनबाट लोसपाका संजय साह र एमाले जसपा गठबन्धनबाट जसपाका शैलेन्द्र यादवले उम्मेदवारी दर्ता गराएका छन भने २ (ख) मा सत्ता गठबन्धनबाट माओवादीका श्यामकुमार यादव र एमाले जसपा गठबन्धनबाट जसपाका रामआशिष यादवले उम्मेदवारी दर्ता गराएको छ ।
यो विषयमा आफ्नो प्रतिक्रिया दिनुहोस् !