जनकपुरधाम, असाेज १८ गते । माहामारीका रूपमा फैलिंदै गएकाे डेङ्गीका कारण नेपालमा ४१ जनाले ज्यान गुमाएका छन ।
इपिडिमियोलोजी तथा रोग नियन्त्रण महाशाखाका अनुसार हिजो बेलुकासम्मको तथ्यांक अनुसार अहिलेसम्म डेङ्गी भएर ४१ जनाको ज्यान गएको पुष्टि भएको छ । डेङ्गी संक्रमितको संख्या ३१ हजार नाघेको छ ।
चाडपर्व तथा पानी परिरहेकाले डेङ्गी अझै फैलिन सक्ने जोखिम रहेको इपिडिमियोलोजी तथा रोग नियन्त्रण महाशाखाको कीटजन्य रोग निवारण शाखाका प्रमुख डाक्टर गोकर्ण दाहालले बताएका छन ।
बिहान बेलुका चिसो हुन थालेकाले डेङ्गीको संक्रमण केही कम हुने आंकलन गरिए पनि पानी परिरहेकाले जोखिम उस्तै रहेको उनकाे भनाइ छ । उनले भने , ‘अब चिसो सुरु भयो, लामखुट्टे मर्छ भनिहाल्ने अवस्था छैन, पानी परिरहेकाले डेङ्गीको संक्रमण जतिबेला पनि फैलिन सक्छ । पानी पर्न रोकिए पछि भने विस्तारै संक्रमण पनि घट्दै जाने छ ।’
डेङ्गीको संक्रमण फैलिरहेकाले दशैँमा एक ठाउँबाट अर्को ठाउँमा ओहोरदोहोर गर्दा सचेत रहन पनि उनकाे सुझाव छ । डेङ्गी देशभर फैलिएकाले संक्रमणको जोखिम अझै पनि उच्च छ । दीर्घ र अन्य रोग भएकालाई डेङ्गी भएमा स्वास्थ्यमा थप समस्या हुने भएकाले यस्ता खालका बिरामीलाई बढी सचेत रहन जरूरी रहेकाे डाक्टर दाहालले भने ।
डेङ्गीबाट जोगिने एक मात्रै उपाय भनेको लामखुट्टेको टोकाइबाट नै जोगिनु हो । घर वरिपरि पानी जम्ने खाल्डाखुल्डी पुर्न, पूरा बाउला भएका कपडा लगाउन र एक हप्ता भन्दा लामो समयसम्म बाल्टीलगायत भाँडोमा पानी जम्मा गरेर नराख्न पनि डाक्टरको सुझाव छ ।
यो विषयमा आफ्नो प्रतिक्रिया दिनुहोस् !