जनकपुरधाम, असोज ५ गते । मधेश केन्द्रित दलहरुले नागरिकता विधेयक प्रमाणीकरण नगरेको विरोधमा राष्ट्रपति विद्यादेवी भण्डारीको पुत्ला दहन गरेका छन ।
राष्ट्रपति भण्डारी विरुद्ध विरोध प्रदर्शन गर्दै बुधवार मधेश केन्द्रित दलहरुले जनकपुरधाममा पुतला दहन र चक्काजाम गरेका छन भने त्यस्तै प्रदेशका प्रमुख प्रतिपक्षी दल लोसपाले विरोध प्रदर्शन स्वरुप जनकपुरधामको पिराडी चोकमा चक्काजाम गरेका हुन ।
जनता समाजवादी पार्टी (जसपा) र तराई मधेश लोकतान्त्रिक पार्टी (तमलोपा) ले नगरमा विरोध जुलुस प्रदर्शन गर्दै जनकपुरधामस्थित जनक चोकमा राष्ट्रपति भण्डारीको पुत्ला दहन गरेका हुन भने लोकतान्त्रिक समाजवादी पार्टी चक्काजाम गरेका छन ।
पुत्ला दहन कार्यक्रमलाई सम्बोधन गर्दै जसपाका नगर अध्यक्ष विष्णुदेव साहले दोश्रो पटकमा पारित गर्नुपर्ने संवैधानिक व्यवस्था भएपनि मधेश विरोधी भावनाले ग्रसित भई विधेयक खारेज गराएको विरोधमा जसपाले विरोध प्रदर्शन गदै राष्ट्रपतिज्यको पुत्ला दहन गरेको बताए ।
यता लोसपा निकट लोकतान्त्रिक युवा संघका जिल्ला अध्यक्ष प्रशान्त झाले राष्ट्रपतिले संविधानलाई अवज्ञा गरेकाले आफूहरू बाध्य भएर आन्दोलनमा उत्रिनु परेको बताए । लोसपाले राष्ट्रपति भण्डारीको राजीनामासमेत माग गरेको छ । राष्ट्रपतिको कदम असंवैधानिक भएको भन्दै मधेसवादी दलहरूले आन्दोलनको चेतावनी दिइरहेका छन् ।
त्यस्तै तमलोपाकी नेतृ विभा ठाकुरले भनिन, ‘संविधानको घोर उल्लंघन र आफ्नै देशको जनताबिरुद्ध षडयन्त्र गर्ने व्यक्ति कुनै पनि दृष्टिले राष्ट्रपति पदको निमित्त एक क्षणको लागि पनि योग्य हुन सक्दैन । त्यसैले हामीले राष्ट्रपति भण्डारीको तत्काल राजीनामाको माग गरेका हौं ।’
नागरिकता विधेयक प्रमाणीकरण नगर्ने राष्ट्रपतिको निर्णयलाई लिएर दलहरु दुई ध्रुवमा बाँडिएका छन् । सत्तारुढ दल र मधेसवादी दलहरुले राष्ट्रपतिको विरोध गरेका छन् भने नेकपा एमाले, राप्रपा नेपाल लगायतका दलहरु राष्ट्रपतिको पक्षमा देखिएका छन् ।
यो विषयमा आफ्नो प्रतिक्रिया दिनुहोस् !