जनकपुरधाम, असोज ४ गते । आगामी मंसिर ४ गते हुने प्रतिनिधि तथा प्रदेश सभा सदस्य निर्वाचनमा मास्टर साहेबको रुपमा चर्चित कारी यादव पनि चुनाव लड्ने भएको छ ।
मंगलवार एक पत्रकार सम्मेलन आयोजना गरी देशमा व्याप्त भ्रष्टाचार र कमिशनखोरी अन्त्यका आफूले धनुषा क्षेत्र नम्बर २ बाट स्वतन्त्रमा उम्मेदवारी दिने उनले घोषणा गरे ।
धनुषाको औरही गाउँपालिका वडा नम्बर–२ पौरेश्वर बस्ने कारी यादव (मास्टर साहेब) २०२५ सालदेखि मावि स्तरमा प्रथम श्रेणीको शिक्षक भई प्रधानाध्यापकको पदबाट २०७० सालमा अवकाश प्राप्त गरी हालसम्म विभिन्न संघ संस्थामा आवद्ध भई मधेशी जनताको हकअधिकार स्थापितका लागि आन्दोलनकारीको भूमिका निर्वाह गर्दै समाजसेवा गर्दै आएका छन् ।
पत्रकार सम्मेलनमा उनले भने, ‘म आफ्नो जीवनको सुरुदेखि कमिशनखोर, भ्रष्टाचार तथा कुशासनको विरुद्ध संघर्षरत छु । पञ्चायत कालदेखि अहिलेसम्म देशको राजनैतिक परिवर्तन आन्दोलनको हर मोडमा भूमिका निर्वाह गर्दै परिवर्तनको आन्दोलनमा धेरै शहिद भए र लाखौं युवा सुन्दर भविष्यको सपनामा आफ्नो जवानी गुमाए । तर उपलब्धी राम्रो भएनन् । ती सपना साकार गर्न आफू चुनाव लड्ने निर्णयमा पुगेको हुँ ।
‘देशमा शिक्षा, स्वास्थ्य, कृषि, उद्योग, धार्मिक एवं सामाजिक अवस्था चिन्ताजनक रहेको छ भने उद्योग, कल कारखाना बन्द हुने अवस्थामा पुग्नुका साथै सेवामूलक भनिएका शिक्षा र स्वास्थ्यमा व्यापारिकरण भएको छ । बेरोजगारीले गर्दा लाखौं युवा पलायन हुदैछन् । हर निकायमा कमिशनखोर र भ्रष्टाचारीको विगविंगीले तिनीहरुमा डरभर नामको चिज हराएपछि देश सञ्चालनको निकायहरु पंगु भएकाले त्यसमा सुधार गर्न आफूले आउंदो निर्वाचनमा उम्मेदवारी दिने मनसाय बनाएको उनले भने ।
उनले आफू निर्वाचित भए कमिशनखोर, भ्रष्टाचार र कुशासन तथा धर्म निरपेक्ष विरुद्ध गाउँदेखि सदनसम्म जोरदार आवाज उठाउने प्रतिवद्धतासमेत व्यक्त गरेका छन् ।
उनले आफू निर्वाचनमा विजयी भए देशमा शिक्षा, स्वास्थ्य, कृषि, उद्योग, बेरोजगारीको साथै सर्वाङ्गिण विकासका लागि आवश्यक पहल गर्ने, धर्म संस्कृतीको रक्षा गर्दै नेपाललाई हिन्दु राष्ट्रमा पुर्नस्थापना गराउन आवश्यक कदम चाल्ने र धर्म निरपेक्षलाई धर्म सापेक्ष बनाउनुका साथै आफ्नो मुल मुद्दा हिन्दु राष्ट्र नेपाल, भ्रष्टाचार निर्मूल र देश विकाश गर्ने भने ।
यो विषयमा आफ्नो प्रतिक्रिया दिनुहोस् !