जनकपुरधाम, भदौ २९ गते । मधेश प्रदेशका मुख्यमन्त्री लालबाबु राउतले वैदेशिक राेजगारमा पलायन हुने युवा जनशक्तिलाई सिपयुक्त दक्ष बनाउन नसक्नुमा हाम्राे पनि कमजाेरी रहेकाे भनी दुख व्यक्त गरेका छन ।
उनले भने देशमा रोजगारीको अवसर नभएकै कारण यहाँका युवा आफ्ना श्रम शक्ति बेच्न विदेश पलायन हुन बाध्य छन । तर तिनीहरूमा सीप आभावले उचित पारिश्रमिक नपाउने र ज्यान समेत गुमाउनु परेकाे अवस्था रहेकाे बताए ।
नेपाल घरेलु तथा साना उद्योग महासंघद्वारा जनकपुरधाममा आयोजित श्रम बजार सूचना कार्यशाला गोष्ठीमा प्रमुख अतिथि मुख्यमन्त्री राउतले वैदेशिक रोजगारमा जाने र बेरोजगार युवाहरुलाई दक्ष बनाउन सीप दिनमा संघ र प्रदेश दुवै सरकार असफल रहेकाे भने ।
मुख्यमन्त्री राउतले विश्व बजार तथा नेपालको आवश्यकता अनुसार युवाहरूमा नयाँ नयाँ विषयको ज्ञान र सीपको विकास गर्न प्रदेश सरकारले सिटीईभीटी संग समन्वय गरयाे । तर आवश्यक काम गर्न सकेनाै भनी आत्मलाेचना गरे ।
उनले यी समस्याकाे दिर्घकालिन समाधानका लागि सिटिईभिटीले पनि आफ्नो कार्यक्रममा परिमार्जन गर्नुपर्ने र प्रत्येक सक्षम सामुदायिक विद्यालयमा प्राविधिक शिक्षा लागू गर्न आवश्यक रहेकाे कुरामा जाेड दिए ।
नेपाल घरेलु तथा साना उद्योग महासङ्घ सहित पाँच वटा संस्थाद्वारा आयाेजित साे कार्यक्रममा मधेश प्रदेशका उद्योग, पर्यटन, वन तथा वातावरणमन्त्री शत्रुधन महतोले नेपालको कृषि क्षेत्रको विकासका लागि दक्ष कृषि प्राविधिकको अभाव भएको बताउँदै कृषि, उद्योग, पर्यटनको विकास बिना देशको विकास सम्भव नरहेकाे बताए ।
त्यस्तै जनकपुरधाम उपमहानगरपालिकाका प्रमुख मनोज कुमार साहले मुलुकको समृद्धि र विकासका लागि कृषि क्षेत्रको लगानीमा वृद्धि गर्न आवश्यक रहेकाे बताउंदै कृषिमा लगानी बढाइए स्वदेशमै राजगारीकाे वातावरण बनाउन सकिने बताए ।
नेपाल घरेलु तथा साना उद्योग महासङ्घका केन्द्रीय अध्यक्ष उमेश प्रसाद सिंहले दैनिक ५ देखि १० हजारको हाराहारीमा युवाहरु विदेश पलायन भइरहेको छ तर त्यसमा दैनिक ५ देखि १० वटा शव आइरहेको दुखद कुरा रहेको छ । यसमा संघ र प्रदेश दुवै सरकारलाई ध्यान दिनुपर्ने आवश्यकता रहेकाे कुरामा जाेड दिए ।
उनले नेपालको श्रम बजारमा ३२ लाखलाई यस क्षेत्रले रोजगारी दिए पनि त्यसमा १२ लाख विदेशी नै भएकाले त्यसलाई विस्थापित गर्नका लागि विभिन्न ४० क्षेत्रमा युवाहरूलाई सीप तथा ज्ञान दिन आवश्यक बताए ।
यो विषयमा आफ्नो प्रतिक्रिया दिनुहोस् !