जनकपुरधाम, भदौ १६ गते । मधेश प्रदेशका राजधानी जनकपुरधाममा अवैध रुपमा संचालनमा रहेका दर्जनौ अस्पतालमा चिकित्सकको लापरवाहीका कारण बिरामीको ज्यान गइरहेको छ । सम्बन्धित निकायको लापरवाहीका कारण जनकपुरधाम क्षेत्रमा मापदड विपरित सञ्चालित निजी अस्पतालहरुमा चिकित्सकको लापरवाही र अदक्ष सेवाले बिरामीको मृत्यु मात्र होइन रकम लुटने गरेका छन ।
यस्तै अवैध अस्पतालमा मध्येका एक जनकपुरधामको जनकपुरधामको रामानन्दचोकस्थित नैना हस्पिटल । जहाँ बुधवार एक नवजातको शिशुको चिकित्सकको लापरबाहीका कारण मृत्यु भएको छ । प्रादेशिक अस्पतालमा जन्मेका ती शिशुको प्रादेशिक अस्पतालकै एक चिकित्सकले गरेको बिचौलियाको भूमिकाले ज्यान गुमाउनु परेको हो ।
सर्लाहीको ब्रम्हपुरी गाउँपालिका–३ त्रिभुवननगर बस्ने रविन्द्र साहकी पत्नी चंचला देवीको प्रादेशिक अस्पतालमा अपरेशन गरी बच्चा निकालियो । अपरेशन पश्चात प्रादेशिक अस्पतालमा कार्यरत डा. अभय मण्डलले शिशुको अवस्था गम्भीर रहेको भनी चंचलाका श्रीमान रविन्द्र मण्डललाई एनआईसीयूमा राख्न सुझाव दिए ।
डा. मण्डलले एनआइसियूमा राखेर उपचार गर्नुपर्ने भन्दै प्रादेशिक अस्पतालको एनआइसियू खाली छैन रामानन्द चोक स्थित डा. बृजमोहन रजकले संचालन गरेको नैना हस्पीटलमा राख्न जान दवाव दिए । जबकि सो दिन प्रादेशिक अस्पतालमा पनि एनआईसीयू बेड खाली नै रहेको छ ।
प्रादेशिक अस्पतालमा एनआईसीयू बेड खाली हुँदाहुँदै पैसा कमाउने लोभमा डा. मण्डलले आफू स्वयं कार्यरत सो अस्पतालमा ती नवजात शिशुलाई पठाई दिए । नैना हस्पीटलमा त पठाई दिए तर चिकित्सककै लापरवाहीका कारण ती नवजात शिशुलाई ज्यान गुमाउनु परयो ।
‘डाक्टरलाई शिशुको अवस्था ठिक छैन भने अन्यत्र रेफर गरिदिन आग्रह गर्दागर्दै डा. मण्डलले अवस्थामा सुधार आइरहेको छ कहीं जानु पर्दैन भन्दै आएको थियो । तर एक्कासी बुधबार शिशुको मृत्यु भइसकेको जानकारी गराउँदा हामी आश्चर्यमा पर्यौं पिडीत रविन्द्रले संचारकर्मीसँग कुरा गर्दै दुखेसो सुनाए ।’ चिकित्सकहरुले शिशुको हर्टबिट कम रहेको भन्दै उसलाई एनआइसियूमा भर्ना गर्न लगाएको र दुई दिनमा ३२ हजार रुपैयाँको बिल बनाएर अन्ततः आफ्नो सन्तानलाई मारेको रविन्द्रको दाबी छ ।
घटना सम्बन्धमा डाक्टर अभय मण्डलले आफूले नै नैना हस्पीटलमा जान सुझाव दिएको स्वीकार गर्दै भने बच्चाको हार्टबीट कम रहेको कारण प्रादेशिक अस्पतालमा एनआईसीयू खाली नभएकाले पठाएको थिए । नैना हस्पीटलमा एनआइसियूमा राखेर उपचार गरेर शिशुलाई बचाउने सम्पूर्ण प्रयास गरेकै हो । तर, बचाउन सकिएन ।’
स्वास्थ्य सेवा प्रदान गर्ने उद्देश्यले निजी अस्पताल सञ्चालन गर्दा कम्पनी रजिष्टारका साथै बेड संख्याको आधारमा स्थानीय तह, प्रदेश वा संघमा दर्ता गरेर मात्र संचालन गर्नुपर्ने प्रावधान छ । तर जनकपुरधाममा दर्जनौ यस्ता अस्पताल छन जुन कम्पनी रजिष्टरामा त दर्ता छन तर अधिकार प्राप्त स्वास्थ्य निकायमा दर्ता छैनन । जसमध्ये नैना हस्पीटलमा पनि एक हो ।
डा.बृजमोहन रजकले सञ्चालन गरेको नैना हस्पिटल प्रालि ५० शैयाको यो अस्पताल विगत १६ महिनादेखि दर्ताबिना नै सञ्चालनमा रहेको पाइएको छ । नियमतः सो अस्पताल प्रदेशको सामाजिक विकास मन्त्रालय अन्तर्गतको स्वास्थ्य महाशाखामा दर्ता हुनुपर्ने हो । तर दर्ता नगरीकनै संचालन गर्दै आएका छन ।
सरकारले जारी गरेको स्वास्थ्य संस्था स्थापना, सञ्चालन तथा स्तरोन्नति मापदण्ड निर्देशिकाविपरीत यो अस्पताल सञ्चालित छ । स्वास्थ्य निर्देशनालयका निर्देशक विजय झाले भने, ‘यो अस्पतालको दर्ता सम्बन्धमा कुनैपनि कागजात आफू कहाँ आएको छैन् । अस्पताल सञ्चालन बारे हामीलाई कुनै जानकारी छैन् ।’
यस सम्बन्धमा अस्पतालका सञ्चालक डा. बृजमोहन रजकले आफूहरु हस्पिटल दर्ताको प्रक्रियामा रहेको बताए । हस्पिटल सञ्चालन गरेको १६ महिना बितेपनि हालसम्म दर्ता हुन नसकेको स्वीकार्दै उनले तत्काल दर्ताको प्रक्रियामा जाने भनेर पन्छिएका छन ।
यो विषयमा आफ्नो प्रतिक्रिया दिनुहोस् !