जनकपुरधाम, साउन २२ गते । मधेश सरकारले एक हप्ता भित्रै प्रहरी समायोजन तथा हस्तान्तरण नभए संघीय सरकार विरुद्ध अहिंसात्मक आन्दोलन गर्ने चेतावनी दिएका छन ।
संघीय सरकारले प्रहरी समायोजन गर्न आलटाल गरिरहेकाे कारण एक हप्ते अल्टिमेटम सहित गृह तथा सञ्चार मन्त्री भरत साहको नेतृत्वमा प्रदेश सरकारका एक टोलीले आइतवार प्रदेश प्रमुख हरिशंकर मिश्र मार्फत प्रधानमन्त्री शेरबहादुर देउवालाई ध्यानाकर्षण गराएकाे छ ।
संविधान तथा संघीय ऐनले प्रहरी र शान्ति सुरक्षाको जिम्मेवारी प्रदेशलाई सुम्पिएकोमा पटक पटक प्रदेश सरकारहरुले संघीय सरकार ध्यानाकर्षण र पछिल्लो पटक प्रदेशहरुको तर्फबाट मधेश प्रदेश सरकारले ज्ञापन पत्र समेत बुझाइसकेको अवस्थामा प्रहरी समायोजन नहुनुले प्रदेश प्रशासन बिनाको रहेको अनुभुति भइरहेको ज्ञापन पत्रमा भनिएको छ ।
गृह तथा सञ्चार मन्त्री साहले बुझाएको ज्ञापन पत्रमा आगामी निर्वाचन अगावै ७ दिन भित्र समायोजित प्रहरीलाई प्रदेश सरकारलाई हस्तान्तरण नगरिए शान्तिपुर्ण अहिंसात्मक आन्दोलन गर्ने चेतावनी दिइएको छ ।
पछिल्लो पटक मुख्यमन्त्री लालबाबु राउतको नेतृत्वहरुमा प्रधानमन्त्री शेरबहादुर देउवा, गृह मन्त्री बालकृष्ण खांड सहित गठबन्धनका नेताहरुलाई ज्ञापन बुझाएको तर संघीय सरकार समायोजन गर्ने मनसायमा नदेखिएकोले आन्दोलनको बाटो रोज्नु परेको संचारकर्मीसँग कुरा मन्त्री साहले बताए ।
सो ज्ञापन पत्र बुझाउने टोलीमा भौतिक पुर्वाधार विकास मन्त्री रामसरोज यादव, भूमिव्यवस्था, कृषि तथा सहकारी मन्त्री विजय यादव, उद्योग, पर्यटन तथा वन मन्त्री शत्रोध्न महतो र खानेपानी तथा उर्जा विकास मन्त्री ओमप्रकाश शर्मा सहित प्रदेश सभा सदस्यहरुको सहभागिता रहेको थियो ।
यो विषयमा आफ्नो प्रतिक्रिया दिनुहोस् !