जनकपुरधाम, असार १५ गते । जनकपुधाम उपमहानगरपालिका कृषिलाई प्राथमिकता दिदैं पहिलो पटक धान दिवस मनाएको छ ।
१९ औं राष्ट्रिय धान दिवस तथा रोपाई महोत्सवको अवसरमा जनकपुरधाम उपमहानगरपालिका समेतले “अन्नबाली जनकपुरधामको रखवाली” भन्ने मूल नाराका साथ बुधवार जनकपुरधाम २० स्थित नोचा पोखरी नजिक धान रोपेर धानबाली दिवस मनाएका छन ।
कार्यक्रमलाई सम्बोधन गर्दै उपमहानगरपालिकाका मेयर मनोज साहले कृषि क्षेत्रलाई प्राथमिकता दिदैं उपमहानगरपालिकाले कृषि उत्पादन बढाउन विभिन्न कार्यक्रमहरु आगामी आर्थिक वर्षदेखि कार्यान्वयनमा ल्याउन लागेको जानकारी दिए ।
उनले भने यहाँ प्रमुख समस्या रसायनिक मलको छ, त्यसमा नियन्त्रण सहितका सर्वाधिकार नेपाल सरकारको रहेको छ डिलरबाट किसानसम्म पुरयाउन उपमहानगरपालिकाले सहजता मात्र गर्न सक्छ । त्यसका लागि उपमहानगरले डिलरलाई चाँडोभन्दा चाँडो मलखाद्य उपलब्ध गराउन पत्राचार गरिसकेको छ ।
उपमहानगरले आगामी आर्थिक वर्षदेखि यहाँका कृषि उत्पादकत्व बढाउन माटो परिक्षण, जैविक मलको उत्पादनमा जोड, यान्त्रिकीकरण, सिचाईको सहज उपलब्धता र कृषि मिटरमा छुट, चौपाया गाईवस्तुमा अनुदान लगायतका कार्यक्रम ल्याउन लागेको जानकारी समेत मेयर साहले दिए ।
उनले भने रसायनिक मल र औषधि छिडकाउको बढी प्रयोगले खेतको उर्वरा शक्ति कम हुने, जैविक तत्व समाप्त हुनुले उत्पादनमा ह्रास आइरहेको कारण उपमहानगरले जैविक कम्पोष्ट मल उत्पादनमा जोड दिनेछ । सम्भवत उपमहानगरपालिकाले आफै उत्पादन गर्न सक्नेछ वा किसानलाई प्रोत्साहित गर्नेछ ।
यसका साथै माटो परिक्षणको कार्यक्रम समेत अगाडि बढाउने, उपमहानरले तयार पारेको प्रतिवेदनको आधारमा खाद्य वस्तुको उत्पादनमा जोड दिनेछ, किसानहरुलाई अनुदानमा धान काट्ने, हाते टयाक्टर, अन्नबाली भित्राउने मेसिन सम्भव भए निशुल्क उपलब्ध वा अनुदानमा उपलब्ध गराउने कार्यक्रम पनि आगामी आ.ब.मा समेटिएको जानकारी मेयर साहले दिए ।
मेयर साहले भने यति मात्र होइन मालपोत र नापी कार्यालयसँग समन्वय गरी विल्डप (वस्ती निर्माण) र कृषि योग्य क्षेत्र छुटयाएर प्रतिवेदन तयार पारिनेछ । सो प्रतिवेदनकै आधारमा खेती योग्य जग्गालाई ग्राहयतामा राखि कृषि उत्पादकत्वमा जोड दिइनेछ ।
उपमहानगरपालिकाको कृषि शाखाद्वारा आयोजित सो कार्यक्रममा उपमहागरपालिकाका प्रमुख प्रशासकीय अधिकृत प्रद्युम्न प्रसाद उपाध्यायले उपमहानगरभित्र कृषि उत्पादकत्व बढाउन उपहानगरले किसानलाई सहज हुने गरी विभिन्न कार्यक्रम ल्याएर कार्यान्वयनमा ल्याउने प्रतिबद्धता जनाए । कार्यक्रममा मेयर साह र प्रमुख प्रशासकीय अधिकृत उपाध्याय सहित वडा नम्बर १०, १५ र २० अध्यक्ष, उपमहानगरपालिकाका कर्मचारी सो क्षेत्रका एक दर्जनभन्दा बढी किसानहरुले धान रोपेका थिए ।
यो विषयमा आफ्नो प्रतिक्रिया दिनुहोस् !