जनकपुरधाम, असार १२ गते । देशमा बेरोजगारीले जडो गाड्दै गएपछि आम जनताको लागि एउटै विकल्प छ वैदेशिक रोजगारी ।
वैदेशिक रोजगारीले आम जनताको जीवनमा परिवर्तनभन्दा पनि देशको ढृकुटीमा राजश्वले बढी फाइदा पुरयाउंदै आएको छ । जसको परिणाम देशको कुल बजेटमा अधिकांश श्रोत वैदेशिक रोजागरीबाट आएका रेमिन्टान्स हो ।
वैदेशिक रोजगारीले आम जनताको पेट पाल्न सहज पुरयाउंदै गएको कुरालाई नकार्न सकिदैन तर त्यसले उब्जाएको विकृतिको घटनाले समाजमा भयावह स्थिति श्रृजना गर्दै गएको छ । जसको प्रत्यक्ष उदाहरण हो जनकपुरधाम उपमहानगरपालिका २१ कुर्थाकी नेहादेवी साह । जसलाई गर्भवती अवस्थामै श्रीमानको शंकाले ज्यानै गुमाउनु परेको छ । करीब ५ वर्षअघि महोत्तरी जिल्ला गौशाला नगरपालिका २ निवासी उपेन्द्र साह सोनारकी छोरी निशा भनिने नेहा साहको जनकपुरधाम २१ कुर्था निवासी विसुनदेव साहसँग बिहेको भएको थियो ।
एक छोरा भएपछि विसुनदेव वैदेशिक रोजगार गए । वैदेशिक रोजगारीबाट गत तीन महिनाअघि फर्केको विसुनदेव र नेहाबीच विवाद हुँदै आएको थियो । स्थानीयका अनुसार नेहाको चरित्रमाथि शंका गर्दै विसुनदेवले नेहामाथि हिंसात्मक व्यवहार गर्दै झै झगडा कुटपिट गर्दै आएका थिए ।
श्रीमानको हिंसात्मक प्रताडनाबाट आजित भई नेहा एक महिनाअघि आफ्ना ४ वर्षिय छोरालाई लिएर माइत गौशाला गएर बस्न थालेकी थिइन । तीन दिनअघि विसुनदेवले नेहालाई अब केही गर्दैनौ भनी ललाई फकाई आफ्ना घर कुर्था ल्याएका थिए । तर ससुराली आएको तीन नबित्दै उनलाई ज्यान गुमाउनु परेको छ ।
नेहाका श्रीमान विसुनदेवका अनुसार आज बिहान चापाकल नजिक एक्कासी आफै ढलेपछि उपचारका लागि ल्याउंदा ल्याउंदै मृत्यु भएको छ । नेहालाई उपचारका लागि जानकी हेल्थकेयरमा ल्याउंदा चिकित्सकहरुले मृत घोषणा गरेका थिए । नेहाको शरीरका केही भाग र घाँटीमा डाम देखिएको कारण हत्या गरिएको माइती पक्षले आरोप लगाउंदै आएका छन । मृतक नेहाका दाई बिजय साहले हिजो शनिवार बिहान बहिनी नेहाले आफूलाई कुटपिट गरेको फोन मार्फत जानकारी गराएकी थिईन बताएका छन ।
उनले भने विसुनदेव वैदेशिक रोजगारबाट आएदेखि नै बहिनी नेहाको चरित्रमाथि शंका गर्दै चरम शारिरीक यातना दिदै आएको थियो, त्यो सहन नसकेपछि आफूहरुलाई खबर गरेपछि त्यहाँबाट लगेका थियौ, एक महिना बित्न लाग्दा उनले अब केही नगर्ने राम्ररी राख्छु भनी हाम्रो घरबाट ल्यायो र आज त ज्यान नै लिएका छन ।
विजयले नेहाको हत्या गरिएको आरोप लगाउंदै घटनाको छानबीनका माग गरेका छन । उनले भने शरीरको केही भागमा निलडाम देखिएको कारण हत्या नै गरिएको हुन सक्छ । हाम्रो घरमा रहेको बेलासम्म केही भएन, यहाँ आएको तीन नबित्दै एक्कासी ढल्नु भनेको घटना रहस्यमय छ, सम्बन्धित निकायसँग सत्य तथ्य छानबीन गरी दोषीलाई कडा भन्दा कडा कारवाही हुनुपर्छ ।
विजयले पोष्टमार्टमका साथ साथै बच्चा कसको हो भनी नेहाको पेटमा रहेको बच्चाको समेत डिएनए टेस्टको माग गरेका छन । उनले भने गर्भमा रहेका बच्चाको डिएनए गरिएन भने भोली मेरो बहिनीको चरित्रमाथि शंका कायमै रहनेछ र अपराधी उम्किन सक्छ ।
साथै उनले बिसुनदेवका दाई हुकुमदेव साह प्रहरीमा रहेको र निजकै मिलोमतोमा घटना सामसुम पार्ने वा मिलाउने हत्यालाई आत्महत्यामा परिणत गर्ने चलखेल भइरहेको आशंका समेत व्यक्त गरेका छन ।
यता मृतक नेहाका श्रीमान विसुनदेवले करिव चार वर्षको बैदेशिक रोजगार पछि आफु गत चैतमा घर आएको र नेहा आफुसंग नबस्ने भन्दै दैनिक घरमा तनाव र झैझगडा गर्ने गरेको घटना रहेको भन्दै नेहाको चरित्रमाथि शंका गरेका छन ।
उनले भने आफुसंग राम्रो सम्बन्ध नरहेको अवस्थामा केहि दिन अगाडि मात्र नेहाको पेटमा बच्चा रहेको सुन्दा आफुलाई आश्चर्य लागेपछि आफ्नो पीडा र समस्या सासु, ससुरा र जेठान सबैलाई सुनाएको भएपनि कसैले कुनै सुनुवाई नगरी तिनीहरुले यहाँबाट नेहालाई आफ्नो घर गौशाला लगेको थियो ।
करीब एक महिना राखेर तिनीहरु आफै गएको शुक्रवार नै हाम्रो घर कुुर्थामा राखिदियो । हामीबीच कुनै झै झगडा भएन आज बिहान एक्कासी चापाकल नजिक ढल्यो, हत्या गरिएको भन्ने आफूमाथि लगाइएको आरोप गलत रहेको विसुनदेवले दाबी गरेका छन ।
यसैबीच धनुषा प्रहरीले घटनाको अनुसन्धान भइरहेको जनाएको छ । जिल्ला प्रहरी कार्यालय धनुषाका प्रवक्ता प्रवीण बहादुर क्षेत्रीले भने चापाकल नजिक ढलेको भनेर कुर्थाबाट नेहालाई उपचारका लागि जानकी हेल्थकेयरमा ल्याइयो तर अस्पतालमा चिकित्सकले मृत घोषणा गरेका छन ।
घटनामा माइती पक्षले नेहाको चरित्रमाथि शंका गर्दै ससुराली पक्षले हत्या गरेको आरोप लगाइरहेका छन भने भने विदेशबाट फर्केका विसुनदेवले आफूले हत्या नगरेका दाबी गरेका छन । घटनाको अनुसन्धान भइरहेको छ, पोष्टमार्टमको रिपोर्ट आएपछि मात्रै केही भन्न सकिनेछ हत्या हो कि मृत्यु उनले बताएका छन । साभार @ Ekagaj
यो विषयमा आफ्नो प्रतिक्रिया दिनुहोस् !