जनकपुरधाम, जेठ २२ गते । धनुषाको शहीदनगर नगरपालिकामा विभिन्न जातका १५ हजार विरुवा वितरण गरी विश्व वातावरण दिवस मनाइएको छ ।
आइतवार नगरपालिकाका मेयर दिनेश प्रसाद यादवको प्रमुख आतिथ्यमा करीब ६ सयभन्दा बढी घर परिवारलाई १५ हजार रुख विरुवा वातावरणमा पर्ने प्रतिकुल असरबाट जोगाउन वितरण गरिएको हो ।
यूएनडीपी, हेफर नेपाल, फ्रीडम फण्ड र सामुदायिक सुधार केन्द्र (सीआईसी) को संयुक्त आयोजनामा शहीदनगर नगरपालिका वडा नम्बर १ चिरैयाका स्थानीयवासीलाई कटहल, गम्हाइर, अर्जुना र इपिलिपी लगायत प्रजातिका रुख विरुवा वितरण गरिएको जनाइएको छ ।
सामुदायिक सुधार केन्द्रसँग आबद्ध ३० वटा समूहका ६ सय घरपरिवारका व्यक्तिहरुलाई १० वटाको दरले हाललाई १५ हजार रुख विरुवा प्रदान वितवरण गरिएको छ भने नगरपालिकाका ९ वटै वडामा अझै रुख विरुवा वितरण गर्ने कार्यक्रम रहेको केन्द्रका संजय साहले जानकारी दिए ।
कार्यक्रमलाई सम्बोधन गर्दै मेयर यादवले भने वातावरणको प्रतिकुल असरले मानिसमा हुने संकट न्यूनीकरणका लागि रुख विरुवा रोप्नु आवश्यक रहेकाले नगरपालिका आजैकै मितिदेखि प्रत्येक परिवारले कम्तिमा ५ वटा रुख विरुवा रोप्नुपर्ने निती नगरपालिकाले लिएको बताए ।
उनले भने यो कार्यक्रमले नगरमा हरियालीका साथै वातावरणमा पर्ने असरबाट समेत जोगिनेछ र यहाँका जनताको आयआर्जनको श्रोतको रुपमा समेत विकास हुनेछ । रुख विरुवा रोप्ने घर परिवारलाई आगामी दिनमा नगरपालिकाले प्रोत्साह समेत गर्ने प्रतिबद्धता समेत मेयर यादवले जनाए ।
रुख विरुवा वितरणका साथै मेयर यादव, केन्द्रका पदाधिकारी तथा गाउँका भद्रभलामीहरुले कार्यक्रम स्थल चिरैया स्थित सामुदायिक भवनको प्रांगणमा संयुक्त रुपमा वृक्षारोपण गरेका थिए ।
सामुदायिक सुधार केन्द्रद्वारा सो नगरपालिकामा हरुवा चरुवाको आर्थिक आयआर्जनका लागि विभिन्न कार्यक्रम र विपन्न परिवारहरुको आयआर्जनका लागि बाख्रा वितरण लगायतका कार्यक्रमहरु समेत संचालन गर्दै आएको छ ।
कार्यक्रममा संस्थाका पदाधिकारी साहले भने यो शहीदनगर नगरपालिकामा सिआईसीले विपन्न वर्ग तथा हरुवा चरुवाको आय आर्जनका लागि विभिन्न कार्यक्रमहरु संचालन गर्दै आएको छ । आउने दिनमा आवास विहिन यहाँका दलित, गरीब र विपन्न परिवारलाई आवास उपलब्ध गराउने कार्यक्रम ल्याउनेछ ।
अनुमानित एक करोड रुपैया बराबरको अनुमानित बजेट रहेको सो कार्यक्रम नगरपालिकाको समेत सहयोग आवश्यक रहेको जानकारी दिदै साहले नगरपालिकाबाट पहल भएपछि चाँडै सो कार्यक्रम नगरपालिकाको विभिन्न वडामा संचालन हुने बताए ।
कार्यक्रममा स्थानीय विद्यालयका प्रधानाध्यापक मोहन यादवले रुख विरुवा वन जंगल विनाशले वातावरणमा पर्ने असर बारे जानकारी दिदैं मानवीय जीवनको सम्भावित संकटबाट जोगिन प्रत्येक व्यक्तिले रुख विरुवा आ आफ्नो घर वरिपरि र बारी तथा खेतमा रोप्नुनर्पे कुरामा जोड दिएका थिए ।
यो विषयमा आफ्नो प्रतिक्रिया दिनुहोस् !