जनकपुरधाम, जेठ १९ गते । केमिकल पाेखेर नेपालको एकमात्र जनकपुरधाम – जयनगर रेलको एउटा बोगीमा आगलागी भएको छ ।
बिहीबार दिउँसो जयनगर स्टेशनबाट कुर्था आउने क्रममा केमिकल पाेखिएर रेलको एक बोगीमा आगलागी भएको तर तत्कालै नियन्त्रणमा लिइएकाे नेपाल रेल्वे कम्पनीमा महाप्रबन्धक निरञ्जन झाले जानकारी दिएका छन ।
घटना पश्चात् प्रतिबन्धित केमिकल बोकेर जयनगरस्थित १ नम्बर गेटबाट रेलमा प्रवेश गरेकी दुई महिलालाई भारतीय प्रहरीले जयनगरमै पक्राउ गरेर नेपाल प्रहरीको जिम्मा लगाएको उनले जानकारी दिए ।
महाप्रबन्धक झाले भने, दुई महिला केमिकल बोकेर रेलमा बसेकी थिइन रेल खुलेकाे केही क्षणमै केमिकल अर्की एक महिलाको शरीरमा पोखिंदा उनलाई आगोको जलन जस्तो महसुुस भएपछि बोगीभित्र हल्ला मचिएको थियो ।
केमिकलकै छेउमा एउटा सानो ग्यास सिलिण्डर पनि रहेकोले केमिकल पोखिदा आगोको मुस्लो जस्तै निस्केपछि सबै डराएका थिए ।’ तर भारतीय क्षेत्रमै रेल रहेकाे कारण भारतीय प्रहरीले नियन्त्रणमा लिएकाे थियाे ।
महाप्रवन्धक झाले पक्राउ परेकाहरूलाई भारतीय प्रहरीले नेपाल प्रहरीलाई जिम्मा लगाएपछि उनीहरुमाथि अनुसन्धान अघि बढाइने बताए । उनले अहिले रेल जनकपुरधाम आइसकेको छ, आगलागीबाट रेलमा सामान्य क्षति भएको जानकारी दिए ।
यो विषयमा आफ्नो प्रतिक्रिया दिनुहोस् !