विमान दुर्घटना प्रकरण : मुक्तिनाथ दर्शनको सपना बोकेर संसारबाट विदा भए मकरबहादुर

अञ्जली चौधरी
जनकपुरधाम, जेठ १६ गते । आफ्नो कुनै चाहना नभएपनि भान्जा राजन गोले तामाङ्गको आग्रहमा दिदी भिनाजु सँगै मुक्तिनाथ दर्शन गर्ने सपना मकरबहादुर गोले तामाङ्गको सपना विमान दुर्घटनाले अपुरो बनाएको छ ।

हिजो आइतवार बिहान मुस्ताङ जिल्लाको थासाङ्ग गाउँपालिकाको वडा २ सानसुरेमा तारा एयरको भएको विमान दुर्घटनाले धनुषाको मिथिला नगरपालिका ११ लोटा गाउँ निवासी मकरबहादुर श्रीमति सुकमाया तामाङ्ग, दिदी भिनाजु र भान्जा राजन गोले तामाङ्ग संगै मुक्तिनाथ दर्शनको सपना लिएर मृत्युवरणमा पुगेका छ ।

विमान दुर्घटनामा उनी सँगै उनका परिवारका ७ जना सदस्यको एकैसाथ मृत्यु भएको घटनाले पुरै गाउँ नै शोकमग्न भएको छ भने परिवार रुवावासीमा छन । मुक्तिनाथका लागि भान्जा राजनको नेतृत्वमा हिडेंका मकर काठमाडौबाट पोखरा पुगेर, विमानबाट पोखरा हुँदै जोमसोम जाने क्रममा बीच बाटोमै आफू सहित परिवारका ७ जना सदस्य गुमाएका छन ।

सो दुर्घटनामा मकर सहित उनको श्रीमति सुकमाया, भिनाजु इन्द्रबहादुर गोले, दिदी राममाया तामाङ, भिनाजु भाई पुरुषोत्तम गोले, भिनाजु भाईको श्रीमति तुलसादेवी तामाङको मृत्यु भएको छ ।
दुर्घटना खबरपछि लोटा स्थित राजनको कोही नबस्ने गरेको कारण निर्माणाधीन घर अहिले सुनसान छ भने मकरबहादुरको घर पनि सुनसान छ । तर मकरबहादुरको छोरी शान्ति लामा तामाङ्गको घरमा सान्तवा दिन आउने गाउँले तथा आफन्तहरुको ओइरो लागि रहेको छ ।

मकर गाउँकै रातु राप्राविका अवकाश प्राप्त शिक्षक हुन । गाउंकै संस्थापक शिक्षक रहेका ७२ वर्षिय मकरबहादुर करीब १२ वर्ष अगाडि शिक्षक पेशाबाट अवकाश भएपछि नेकपा एकीकृत समाजवादी पार्टीमा आबद्ध भई स्थानीय स्तरमा सामाजिक कार्यमा संलग्न थिए । मकरबहादुरको परिवारमा तीन छोरा र दुई छोरी छन । छोरा मध्ये कान्छा छोरा भूषण कतार बस्दै आएका छन भने सुरेश र उत्तम गाउँमै बस्दै आएका छन ।

छोरीहरुको बिहे भइसकेपनि सोही गाउँमा घर बनाएर बस्दै आएकी छिन । कान्छा छोरा भूषण वैदेशिक रोजगार कतारमा रहेका छन भने सुरेश गाउँमै खेतीपाती गर्दै आएका छन भने उत्तम काठमाडौ राजन संगै उनको फर्ममा काम गर्दै आएको गाउँले छिमेकी बाबुराम गोले तामाङ्गले बताए ।

उनले भने मकर सर निकै राम्रो मान्छे हुनु हुन्थ्यो सबैको दुखसुखमा साथ दिने अति नै मिलनसार व्यक्ति उहाँ हुनु हुन्थ्यो, शिक्षक सेवाबाट अवकाश भएपछि छोरा सुरेश संगै गाउँमै खेतीपाती गर्दै आउनु भएको थियो । तर विमान दुर्घटनामा उहाँको अकास्मिक निधनको खबरले हामी गाउँवासी निकै मर्माहित भएका छौं ।

मकरकी छोरी शान्तिले भाई राजनले हिजो बिहानै करीब १०÷११ तिर फोन गरेर मामा माइजु काठमाडौ आइसकेको छ अब हामी सबै जना मुक्तिनाथका लागि निस्केर पोखरा विमान स्थलमा छौ, केही बेरमा विमान उडने रुदै भनिन् ।

मकरकी अर्का छोरी कान्तिले भकानिदै भनिन् बुवाको मुक्तिनाथ जाने कुनै इच्छा थिएन तर भाई राजनले जीवनको के ठेगान अब बुढेसकाल आइसकेको छ, सबै परिवार संगै मुक्तिनाथ दर्शन गर्न गर्न जाऊ कुरा राखेपछि उहाँ मुक्तिनाथ दर्शनका लागि निकै खुशी भएर शुक्रवार घरबाट बिहान हिडेंका थिए । तर के थाह दैवले यस्तो वितण्डा मचाउनेछ आफूहरुलाई थाहा भएको भए बुवालाई घरबाट जान दिनथिएन ।

उता राजनको लोटा स्थित घरमा कोही नभएको कारण सुनसान छ भने काठमाडौ गोर्केनेश्वर स्थित घरमा रुवावासी छ । राजन परिवारमा बुवाआमाले ज्यान गुमाइसकेका छ भने परिवारमा रहेका श्रीमति दिपा सुवेदी १४ वर्षिय छोरी र १० वर्षिय छोरा सहित काठमाडौमै छन, भाई मनोज गोले तामाङ्ग श्रीमति र छोराछोरी सहित अष्ट्रेलिया बस्दै आएका छन ।

राजन नेकपा एस धनुषाका जिल्ला सदस्य र प्रदेश पर्यटन तथा वन मन्त्री शत्रुध्न महतोका निजी सचिवालय सदस्य हुन । उहाँ काठमाडौ र जनकपुरधाम दुवै ठाउँमा बस्दै आएका थिए । केही दिनअघि स्थानीय तहको निर्वाचनका लागि आफ्ना पार्टीका मेयर पदका उम्मेदवार सुर्य पुडासैनीलाई सहयोग गर्न भोट हाल्न बुवाआमा सहित आफ्नो गाउँ आएका थिए ।

चुनावभरि मतगणना परिणाम आउञ्जेलसम्म गाउँमै आफ्नो घर निर्माणाधिन अवस्थामा रहेकाले मामा मकरबहादुरको घरमा बसेका कुरा छिमेकी बाबुरामले बताए । मतगणना परिणाम आइसकेपछि उनी काठमाडौ गएको र यही बीचमा घटना भइसक्यो अर्का छिमेकी भक्तबहादुर तामाङ्गले बताए ।

राजनका काका पुरुषोत्तम गोले पनि काठमाडौ नै बस्दै आएका थिए । गाउँमा उनको घर पनि छैन । पुरुषोत्तमको परिवारमा तीन छोरा र दुई छोरी छन । छोराहरु सुदर्शन गोले, श्यामदर्शन गोले र विजय गोले परिवार सहित अमेरिकामा बस्दै आएका छन भने छोरीहरु आशा गोले र ससुराली बस्दै आएका छन । छोराहरु अमेरिका र छोरीहरु ससुराली बस्दै आएको कारण एक्लै भएपछि बुढाबुढी गाउँका सबै घरजग्गा बेचेर काठमाडौमै बस्दै आएका थिए ।

पोखरा विमानस्थलबाट जोमसोमका लागि जहाज चढ्नुअघि राजन गोलेले बाबुआमा, काकाकाकी र मामामाइजुको सामूहिक फोटो खिचेर घरमा पठाउएका थिए । सो फोटो अहिले सामाजिक सञ्जालमा भाइरल भएको छ । ती फोटोमा आमाको काँधसँगै परिवारका सबै सदस्यहरूको बीचमा उभिएका राजन निकै खुसी देखिन्छन् । तर वृद्ध बुबाआमा सहित परिवारका अन्य वृद्ध सदस्यहरुलाई मुक्तिनाथ दर्शन गराउने सपना विमान दुर्घटनाले अपुरै भएको छ ।

मधेस प्रदेसका पर्यटन तथा वन मन्त्री शत्रुध्न महतोले यो घटनाले पार्टीलाई ठूलो क्षति पुगेको र पार्टी कार्यकर्ताहरु स्तब्ध रहेको मन्त्री महतोले बताए । उनले भने मेरो एउटा शक्तिको रुपमा रहेका सिपाही समेत रहेका पार्टीले एउटा सक्रिय कमाण्डार गुमाएको छ, यो ठूलो क्षति भएकाले हामी स्तबन्ध छौं ।

राजनको निर्माणाधिन घर तयार भइसकेको छ, पेन्टिङ्ग गर्न र ढोका झ्यालहरु लगाउन बाँकी छ । मन्त्री महतोले भने गाउँमै आधुनिक घर बनाउने राजनको सपना थियो । घर त बन्यो तर पुरा नहुँदै उनको सपना अपुरै भई उनी सँगै गएको छ ।