जनकपुरधाम, जेठ १२ गते । जेल जीवन बिताइरहेका निलम्बित सांसद रेशम चौधरीको रिहासँगै उत्पीडित समुदायको अधिकार प्राप्तिका लागि भन्दै गठित नागरिक उन्मुक्ति पार्टी कैलाली जिल्लामा पहिलो दल भएपछि चर्चाको विषय बनेको छ ।
२०७८ साल पुस १९ गतेका दिन दर्ता भएको सो पार्टीले दर्ता भएको चार महिनापछि निर्वाचनमा जाँदा पार्टी कैलालीमा ४ पालिका जितेर पहिलो बन्न सफल भएको हो ।
पार्टी गठबन्धनको योजनाकार रेशम भने जेलमै छन् । ७ भदौ २०७२ मा भएको टीकापुर घटनामा उनी अदालतबाट दोषी ठहरिएका हुन् । जेलमै रहेर समर्थकहरूलाई पार्टी दर्ता गरी निर्वाचनमा जान सुझाएका चौधरीको पार्टी अन्ततः स्थापित राजनीतिक दलहरूलाई पछि पार्दै पहिलो बनेपछि चर्चामा आएको छ ।
निर्वाचन आयोगले जनाए अनुसार ७५ वर्षे इतिहास बोकेको स्थापित दल नेपाली कांग्रेसलाई पछि पार्दै नागरिक उन्मुक्ति पार्टी पहिलो बनेको हो । जिल्लाको १३ स्थानीय तहमध्ये उक्त पार्टीले सर्वाधिक ४ स्थानीत तहमा जित निकालेको छ । नागरिक उन्मुक्ति पार्टीले जानकी गाउँपालिका, जोशीपुर गाउँपालिका, टीकापुर नगरपालिका र भजनी नगरपालिका जितेको हो ।
कांग्रेसले ३, एमाले र माओवादीले समान २ र नेकपा एकीकृत समाजवादी पार्टीले १ स्थानीय तह जितेको छ । कांग्रेसले कैलारी गाउँपालिका, गोदावरी र लम्की चुहा नगरपालिका तथा एमालेले चुरे गाउँपालिका र बर्दगोरीय गाउँपालिकामा निर्वाचन जितेको आयोगले जनाएको छ ।
आयोगका अनुसार माओवादीले गौरीगंगा नगरपालिका र मोहन्याल गाउँपालिका तथा एकीकृत समाजवादीले घोडाघोडी नगरपालिकामा निर्वाचन जितेका हुन् । धनगढी उपमहानगरपालिका भने स्वतन्त्र उम्मेदवार गोपाल हमाल जितेका छन ।
वैशाख ३० गते हुने स्थानीय तहको निर्वाचनमा उन्मुक्ति पार्टीले धनगढी उपमहानगरपालिसहितका १० वटा स्थानीय तहमा मनोनयन दर्ता गराएको थियो भन्ने कुरा संगठन विभाग प्रमुख लक्ष्मण चौधरीले जनाएको छ । उनले भने ‘हामीले तीनवटा बाहेकका १० वटा स्थानीय तहमा आफ्नो सबै उम्मेदवार खडा गरेका थियौं, तर पहिलो निर्वाचन भएको कारण ४ सिट जितेपनि हाम्रो ठूलो उपलब्धी रहेको छ ।
यो विषयमा आफ्नो प्रतिक्रिया दिनुहोस् !