जनकपुरधाम, वैशाख १८ गते । स्थानीय तह निर्वाचन नजिकदै जाँदा उम्मेदवारहरुले घरदैलो कार्यक्रमलाई तिव्रता दिएका छन ।
यसैक्रममा मिथिला नगरपालिकाका लागि नेपाली कांग्रेसबाट मेयर पदका उम्मेदवार महेन्द्र महतोले पनि घर दैलो कार्यक्रमलाई तिव्रता दिएका छन । अहिले उनी नगरपालिकाका विभिन्न वडामा मतदाताहरुको घर घरमा गुनासो चिर्ने प्रयासमा जुटेका छन ।
नेपाली कांग्रेसबाट नगरप्रमुखमा उम्मेदवारी दिएका महतोले आफू नगर प्रमुखमा विजयी भएपछि पनि नगरवासीका बिच रहेर काम गर्ने प्रतिवद्धता व्यक्त गर्छन् । उनले भने ‘म नगरप्रमुखमा निर्वाचित हुनेमा पूर्ण रुपमा विश्वस्त छु, निर्वाचित भएपछि नगरवासीकै बिच रहेर उनीहरुको सल्लाहकै आधारमा नगर विकासका लागि काम गर्नेछु ।’
अहिले मतदाताहरुको घर घर पुगेर मत माग्न व्यस्त रहेका महतोले आफूले भिजन र मिसनका साथ नगरप्रमुख पदमा उम्मेदवारी दिएको बताए । मिथिला नगरपालिकामा व्यवस्थित शहरीकरणका लागि भिजनको आवश्यक्ता छ, उनले भने ‘यो नगरपालिकालाई कसरी नमूना नगरपालिकाको रुपमा विकास गर्न सकिन्छ भन्ने भिजन म संग छ, मलाई मतदाताहरुले विश्वास गर्नेछन् ।’
नेपाल प्रहरीमा प्रहरी नायब उपरीक्षक पदमा काम गरेर अवकाश प्राप्त गरेका महतोले कोरोना संक्रमणको समयमा काठमाडौँ रह्ने धनुषावासीलाई राहत उपलब्ध गराउनुका साथै घर फर्काउनका लागि पहल गरेका थिए । नेपाल प्रहरीको जागिरबाट अवकाश प्राप्त गरेको महतो आफूसंग प्रशासनिक क्षेत्रको अनुभव समेत रहेकाले नगरमा शान्ति सुरक्षा कायम राखेर विकास कसरी गर्न सकिन्छ त्यो क्षमता आफूमा रहेको दावी गरे ।
विगतको नेतृत्वहरुले गलतीका कारण नगरको विकास हुन नसकेकोमा उनले दुःख समेत व्यक्त गरे । आफू निर्वाचित भए नगरमा शिक्षा, स्वास्थ्य तथा कृषि क्षेत्रमा विकास गर्नका लागि योजनाबद्ध रुपमा काम गर्ने प्रतिवद्धता व्यक्त गरे ।
मिथिला नगरपालिकामा ८० प्रतिशत जनता कृषिमा आश्रित रहेकाले यहाँको किसानलाई सिँचाई, मलखाद्य तथा बिउ विजनको अभाव हुन नदिने दावी गरे । यसका साथै मिथिला नगरपालिकालाई प्राविधिक शिक्षाको केन्द्रको रुपमा विकासका लागि पहल गर्ने जानकारी दिए ।
यो विषयमा आफ्नो प्रतिक्रिया दिनुहोस् !