जनकपुरधाम, वैशाख १२ गते । जनकपुरधाम उपमहानगरपालिकाको नेतृत्वका लागि उम्मेदवारी दिएकाहरुले आफ्नो जीत सुनिश्चित रहेको दाबी गरेका छन ।
मेयर पदका उम्मेदवारहरुले कोही नगरभित्रका कार्यालयहरुको भ्रष्टाचार शून्यमा झार्ने त जनकपुरधामलाई पोखरा काठमाडौ जस्तै बनाई त कोहीले सय दिनभित्र विकासशील नयाँ जनकपुरधाम बनाइ दिने लगायतका मनोयन दर्ता स्थलमा प्रतिबद्धता जनाएका छन ।
लोकतान्त्रिक समाजवादी पार्टीका उम्मेदवार मनोज चौधरीले जनकपुरधामलाई स्वच्छ, सफा, हरियो र फोहरमुक्त बनाउने अभियान सहित यहाँ शिक्षा, स्वास्थ्यको स्तरोन्नतिका साथै समग्र विकासलाई प्राथमिकताका नगर विकासको कार्य अघि बढाउने प्रतिबद्धता जनाए ।
उनले सबभन्दा पहिलो जनकपुरधामलाई नामको मात्र धाम नभई पर्यटकीय क्षेत्रको रुपमा विकास गर्ने, लामुखट्टे मुक्त नगरको रुपमा विकास गर्ने सहितका योजनाहरु अघि बढाउनेछु । तर त्यो कुरा म बोलेर भन्दा पनि जनतालाई गरेर देखाउनेछु ।
कांग्रेसबाट बागी भई उम्मेदवारी दिएका मनोज साहले विकासका मुद्दाहरु अगाडि बढाउने सहित ल्याण्डफिल्ड साइट र सडकको व्यवस्थापन, रोजगारीका अवसर श्रृजना, स्टेडियम निर्माण तथा आउटर रिङ्गरोडको निर्माण गर्ने प्रतिबद्धता जनाएका छन ।
त्यस्तै स्वतन्त्र उम्मेदवार निर्माण व्यवसायी बलराम महतोले आफ्नो जीत सुनिश्चित रहेको दाबी गर्दै आफूलाई पैसाको कुनै लोभ लालच नरहेकोले समाज सेवा गर्न उम्मेदवारी दिएको भने । उनले भने मैले जनकपुरधाममा बनाएको रोडको संरक्षण हुन सकेको छैन, आफूले धेरै शहरहरुको पुर्वाधार निर्माणमा काम गरेकोले आफ्नो अनुभव जनकपुरधामलाई पोखरा र काठमाडौ जस्ता शहरको रुपमा विकास गर्ने योजना अघि सार्नेछु ।
एमालेका उम्मेदवार शिवशंकर साह हिराले भ्रष्टाचारमुक्त भए विकास आफै हुने भएकोले आफ्नो उम्मेदवारी नगरपालिका सहित नगरभित्र रहेका कार्यालयहरुमा हुने भ्रष्टाचारलाई शुन्यमा झार्ने उद्देश्यले रहेको बताए ।
साथै उनले सय दिनभत्र सरसफाई, डम्पिङ्ग साइटको व्यवस्थाप, लामखुट्टे र ट्राफिक व्यवस्थापन तथा एक वर्षभित्र प्रत्येक वडामा एम्बुलेन्स सहित मोहल्ला निशुल्क क्लिनिक संचालन गर्ने जसमा उपचार सहित निशुल्यक प्याथलोजीको व्यवस्था रहनेछ । तीन वर्ष भित्रै यहाँका सामुदायिक विद्यालय र कलेजलाई स्मार्ट स्कूल र कलेजको रुपमा विकास गर्नेछु ।
त्यस्तै हालैमा लोसपा परित्याग गरी एमाले प्रवेश गर्दा पनि टिकट नपाउंदा स्वतन्त्रमा उम्मेदवारी दिएका जानकीराम साहले नयाँ जनकपुरधाम निर्माण गरी टिकट बेचुवाहरुलाई तह लगाउन आफूले स्वतन्त्रमा उम्मेदवारी दिएका बताए ।
तमलोपा उम्मेदवार विभा ठाकुरले जनकपुरधामलाई भ्रष्टाचार मुक्त बनाई टोल टोलमा सडक विस्तार, निशुल्क स्वास्थ्योपचारको व्यवस्था, विद्यालयको स्तरोन्नति, रिङ्ग रोडको निर्माण र यहाँका धरोहरको रुपमा रहेका पोखरी तथा मठ मन्दिरहरुलाई अतिक्रमण बनाई पर्यटकीय स्थलको रुपमा विकास गर्ने प्रतिबद्धता जनाईन ।
यो विषयमा आफ्नो प्रतिक्रिया दिनुहोस् !