जनकपुरधाम । अयोग्य व्यक्तिलाई वैद्य पदकाे करारमा नियुक्ति गर्दा मधेश प्रदेश सरकार बिरुद्ध मुद्दा दायर गरिएकाे छ ।
मधेश प्रदेश सरकार, सामाजिक विकास मन्त्रालय, जनकपुर आयुर्वेद औषधालय, औषधालय प्रमुख र नियुक्त गरिएका तीनजना सहित लगायत ६ जना विरूद्ध मुद्दा दायर गरिएकाे छ ।
पुरनमल्ल ठाकुर र रामप्रवेश मण्डलले उच्च अदालत जनकपुरमा दायर गरेकाे साे मुद्दामा विपक्षीहरूलाई छलफलका लागि फागुन ३० गते हाजिर हुन पेशी ताेकेकाे छ ।
आर्युवेद चिकित्सा अन्तर्गत बिएमएमएस अध्ययन गरेकाहरुलाई बेवास्ता गरि मन्त्रालय र आयुर्वेद औषधालयले पैसाको चलखेल गरेर कम योग्यता भएका आवेदकलाई करारमा नियुक्त गरिएकोले मुद्दा दर्ता गराउनु परेको निवेदक ठाकुरले बताए ।
आयुर्वेद तथा वैकल्पिक चिकित्सा विभाग टेकु प्रदेश तहको कार्यक्रम अन्तर्गत जनकपुर आयुर्वेद औषधालयले नागरिक आराेग्य सेवा केन्द्रका लागि करार नियुक्त गर्ने भनी वैद्य पदमा गएकाे माघ २५ गते विज्ञापन प्रकाशित गरिएको थियो ।
सोही विज्ञापनको आधारमा कम योग्यता भएका व्यक्तिलाई करारमा राखिएको भन्दै मधेश प्रदेश सरकार सहितकालाई विपक्षी बनाएर उत्प्रेष परमादेश जारी गरि पाउँ भनी मुद्दा दर्ता गर्नु परेकाे निवेदक मण्डलले जनाएकाे छ ।
निवेदकले मुद्दामाथीको सुनवाई नभएसम्म विपक्षीहरुलाई काम नगर्नु नगराउन भनी समेत मुद्दामा माग गरेकाे छ।
यो विषयमा आफ्नो प्रतिक्रिया दिनुहोस् !