जनकपुरधाम । महोत्तरीको मटिहानी बजार स्थित पांच पसलमा भएकाे आगलागीमा करोडौँको क्षति भएको छ ।
मटिहानी नगरपालिका ८ स्थित बजारमा भएकाे आगलागीमा परी पाँच वटै पसलमा करीब डेढ करोड रूपैया बराबरको धनमाल जलेर नष्ट भएको जिल्ला प्रहरी कार्यालय महोत्तरीले जनाएकाे छ ।
साे आगलागीमा परी स्थानीय भोलाकुमार महतोले सञ्चालन गरेको सीता किराना पसल, सोही पसलसँगै टाँसिएर रहेको आरएन अडियो, नेपाल म्याक्स टेलर, समीर रेडिमेड र शत्रुधन ठाकुरले सञ्चालन गरेको सैलुन सहितका पसल जलेर नष्ट भएकाे प्रहरी प्रवक्ता एवं प्रहरी नायब उपरीक्षक प्रकाश विष्टले जानकारी दिएका छन ।
विद्युत् सर्ट भई सीता किराना संचालनमा रहेकाे दुई तल्ले भवनमा आगलागी हुँदा ती पसलहरूमा समेत आगलागी भई करीब डेढ कराेड रूपैया बराबरकाे क्षति भएकाे उनले बताए ।
मटिहानी नगरपालिकासँग आफ्नाे बारुणयन्त्र नरहेको कारण करिब दुई घण्टापछि स्थानीय बासिन्दा, सशस्त्र प्रहरी र नेपाल प्रहरीको सहयोगमा आगो नियन्त्रणमा लिइएको प्रवक्ता विष्टले बताए ।
यो विषयमा आफ्नो प्रतिक्रिया दिनुहोस् !