जनकपुरधाम, माघ २९ गते । प्रदेशको नाम मधेश प्रदेश र राजधानी जनकपुरधाम भएको अवसरमा हंसपुर नगरपालिकाको प्रसाहीमा भलिबल प्रतियोगिता आयोजना गरिएको छ ।
हंसपुर नगरपालिकाको आयोजनामा शनिवारदेखि शुरु भएको ६ दिवसीय मेयर कप दोश्रो खुल्ला पुरुष भलिबल प्रतियोगितामा धनुषा सहित विभिन्न जिल्लाका १६ वटा टीमले सहभागिता जनाएको छ ।
हंसपुर नगरपालिकाको वडा नम्बर ७ मा आयोजित सो भलिबल प्रतियोगतामा धनुषाबाट १०, महोत्तरीबाट २, ताप्लेजुङ्ग, नवलपरासी, मधेश प्रदेश छिन्नमस्ता गण सहितका टीमहरुले सहभागिता जनाएको छ ।
सो प्रतियोगितामा धनुषाबाट आयोजक टीमका प्रसाही, गोरदाहा, अन्दुपट्टी, कटरैत, कटरैत उतरवारी टोल, कचुरी, सिरसिया, भोइल, जनकपुरधाम स्थित मनोकामना बोर्डिंग स्कूल, महोतरीका महोत्तरी र करुणा, ताप्लेजुङ्गका पाथिभारा, नवलपरासी तथा छिन्नमस्ता गण सहितका भलिबल टीमले भाग लिएका छन ।
लोकतान्त्रिक समाजवादी पार्टीका वरिष्ठ नेता एवं पुर्व रक्षामन्त्री शरतसिंह भण्डारीको प्रमुख आतिथ्य र नगरपालिकाका मेयर रामज्ञान मण्डलको अध्यक्षतामा एक समारोहकाबीच प्रतियोगिताको उद्घाटन गरिएको छ । प्रमुख अतिथि भण्डारीले रेफ्री भरत यादवलाई भलिबल प्रदान गरेर प्रतियोगिताको उद्घाटन गरेका थिए । सो उद्घाटन सत्रमा विशिष्ट अतिथिको रुपमा संघीय सांसद उमाशंकर अरगरिया, प्रदेश सभा सदस्य परमेश्वर साह र उमपेयर रेणु झाको उपस्थिति रहेको थियो ।
उद्घाटन सत्रको पहिलो दिन गोरदाहा र अन्दुपट्टी टीमले बीच प्रतिष्पर्धा भएको छ । शनिवार भएको सो खेलमा अन्दुपट्टीले जीत हासिल गरेका छन । दुईवटा भएका खेलमा अन्दुपट्टीले नै जितेका छन । पहिलो खेलमा गोरदाहाले १७ र अन्दुपट्टीले २५ प्वाईन्ट ल्याएका थिए भने दोश्रो खेलमा गोरदाहाले २५ र अन्दुपट्टीले २७ प्वाइन्ट ल्याएका थिए । यसबाहेक प्रत्येक दिन चारवटा प्रतियोगिता हुनेछ भने प्रतियोगिताको रेफ्री राष्ट्रिय भलिबल खेलाडी भरत यादवले गर्ने आयोजक टीमले जनाएको छ ।
प्रतियोगिताको फाइनलमा विजयी भएका प्रथम टीमलाई ट्रफी सहित एक लाख रुपैया नगद पुरस्कार दिइने छ भने द्वितीय टीमलाई ५० हजार र तृतीयलाई २५ हजार नगद सहित ट्रफी प्रदान गरिनेछ । प्रतियोगितामा उत्कृष्ट खेलेका खेलाडी, विजयी टीमका सहभागीहरुलाई ट्रफी सहित सम्मान गरिने आयोजक टीमले जनाएको छ ।
खेलकुदका लागि नगरपालिकाबाट १० लाख रुपैया छुटयाइएकोमा ५ लाख यसअघि मेयर कप पहलमानी प्रतियोगितामा रकम खर्च गरिएको थियो भने बाँकी रहेका ५ लाख र वडा कार्यालयबाट एक लाख रुपैया सहित ६ लाख रुपैयाको लागतमा सो भलिबल प्रतियोगिता आयोजना गरिएको जनाइएको छ ।
प्रतियोगिता बारे जानकारी दिंदै आयोजक टीमबाट मेयर मण्डलले युवाहरुको स्वास्थ्य र खेलप्रति रुझान भएको दृष्टिगत गर्दै नगरपालिकाले दुई वर्षदेखि भलिबल प्रतियोगिता आयोजना गर्दै आएको छ । राष्ट्रियस्तरबाट युवाहरुको खेलकुदका लागि कुनै सहयोग नभएपछि नगरपालिकाले आफ्नो बजेटबाट खेलकुद आयोजना गर्दै आएको उनले बताए ।
मेयर मण्डलले भने खेलकुदबाट हामी एउटा स्वस्थ्य युवाको विकास गर्न सक्छौं, यसका कुलतमा फंसेका युवाहरुलाई उन्मुक्ति समेत दिलाउने भएको कारण नगरपालिकाले यहाँका युवाहरुको खेलप्रति आकर्षण समेत बढाउन आफ्नो चासो बढाएको हो ।
यो विषयमा आफ्नो प्रतिक्रिया दिनुहोस् !