जनकपुरधाम । पटक पटक विवादमा तानिदै आएका जनकपुरधामको रामानन्द चौक स्थित तराई राजधानी हस्पीटलको लापरवाहीका कारण फेरी एक बच्चाको ज्यान गएको छ ।
बिना दर्ता अवैध रुपमा सञ्चालित सो अस्पतालले सम्बन्धित निकायको मौनताको फाइदा उठाउंदै उपचार खर्च मिनाहा र क्षतिपूर्ति दिएर अस्पतालका सञ्चालक डा. भगवान सहनी उम्किदै आएको छ ।
पछिल्लो पटक महोत्तरी जिल्लाको बर्दिबास नगरपालिका ६ किसान नगर स्थित चौलेखा बजार निवासी आशिक साहलाई अस्पतालका व्यवस्थापक र चिकित्सकको लापरवाहीका कारण मंगलवार राति आफ्नो बच्चाको ज्यान गुमाउनु परेको छ । तर यसअघि जस्तै पिडित परिवारलाई उपचार खर्च मिनाहा गरेर कारवाहीबाट डा. सहनी उम्किन सफल भएका छन ।
यस्तो छ घटना
प्रसव पीडा तेज भएपछि गत माघ १३ गते नै आशिकले आफ्ना गर्भवती श्रीमति अमृता देवी साहलाई दिनको करीब १२ बजेतिर अस्पतालमा भर्ना गराएका थिए । अस्पतालका डाक्टर गंगा प्रसाद यादवले नर्मल डिलेभरी हुँदैन अपरेशन गर्नुपर्छ भनी अपरेशन गरिदिए ।
अपरेशनपछि ३ किलो २ सय ग्राम वजनको स्वस्थ्य बच्चा पनि जन्मियो, दिनभरि ठिक रहयो, सांझ पख बच्चाले मैला खाइसकेको छ भनी भेन्टिलेटर सहितको एनआईसीयूमा राखिदियो । बच्चाका बुवा आशिक सहितका अभिभावकले बच्चाको अवस्था राम्रो छैन भने बाहिर लग्छु पटक पटक आग्रह गर्दा चिकित्सक गंगा साह र अस्पतालका मैनेजर विकास चौधरीले यही ठिक गरिदिन्छ भनी शुक्रवार र शनिवार दिउंसोसम्म उपचार गरे ।
बच्चाको अवस्था झन बिग्रिदै गएपछि बच्चाका अभिभावकसँग कुनै छलफल वा सोधपुछ नै नगरी शनिवार दिउंसो ५ बजे अस्पताल व्यवस्थापकले आफै एम्बुलेन्स गरी आफ्ना कर्मचारी मार्फत जानकी मन्दिर पछाडि रहेको रामजानकी अस्पतालमा पठाइ दियो । रामजानकी अस्पतालमा पनि बच्चाका बुवा आशिकले यहाँ ठिक हुँदैन मेरो बच्चालाई दिनु बाहिर उपचारका लागि लग्छु पटक पटक आग्रह गर्दा पनि यहीं ठिक हुन्छ भनी जान दिएन ।
अन्ततः आइतवार, सोमवार र मंगलवार दिउंसोसम्मको उपचार पश्चात राति ९ बजे रामजानकी अस्पतालले भन्यो, सो अस्पतालमा गलत उपचारका कारण बच्चालाई बचाउन सकेनौ । अभिभावकले बच्चा मांग्दा अस्पतालको एक लाख दस हजार रुपैया बिल तिर्नुस अनि मात्रै बच्चा लग्न दिन्छु भनेपछि विवाद उत्पन्न भएको हो ।
पिडीत आशिकले भने एक त यहाँ गलत उपचार गरेर बच्चाको अवस्था गम्भीर बनाई दियो, फेरी कमीशनको चक्करमा यहाँका चिकित्सक र व्यवस्थापकले रामजानकी अस्पतालमा पठाई दियो । हामीलाई यहाँ शुरुमै बच्चाको अवस्था गम्भीर छ भनी रेफर पुर्जी दिइ दिएको भए धरान, काठमाडौ वा भारत नै राम्रो उपचारका लागि लग्न सक्थे, तर पैसा कमाउने चक्करमा यी अस्पतालले मेरो बच्चाको ज्यान लिएको छ ।
बुधवार बिहानैदेखि पिडीत पक्षका आफन्तहरुले अस्पतालका संचालक र उपचारमा संलग्न चिकित्सकलाई आउन पटक पटक आग्रह गर्दापनि नआएपछि तिनीहरुले अस्पताल परिसरमा हो हल्ला गरेका छन ।
पिडीत परिवारले आफूहरुको मांग सम्बोधन नभए यो अवैध अस्पताल विरुद्ध कानूनी उपचार खोज्न प्रहरी निकाय र अदालतमा जाने चेतावनी दिएपछि घटना स्थलमा पुगेका जानकी प्रहरी चौकीका सईको नेतृत्वमा पुगेको प्रहरी टोलीले पांच घण्टाको विवादपछि उपचार खर्च मिनाहा गर्ने भन्ने दुवै पक्षलाई सहमति गराएर घटनालाई ढाकछोप गरेका छन ।
क्षतिपुर्ति दिएर घटना ढाकछोप
तराई राजधानी अस्पतालको यो पहिलो घटना होइन यसअघि पनि आधा दर्जनभन्दा नवजात शिशुको अस्पतालका लापरवाहीका कारण मृत्यु भइसकेको छ ती घटनाहरुमा पनि उपचार खर्च मिनाहा र क्षतिपुर्ति दिएर अस्पताल सञ्चालक कारवाहीबाट बचेका छन ।
केही दिनअघि कात्तिक २७ गतेका दिन सर्लाहीको बसबरिया गाउँपालिका–६ बस्ने अजयकुमार साहकी पत्नी सरिता साहले जन्माएकी शिशुको चिकित्सकको लापरवाहीका कारण मृत्यु भएको थियो । सो बेला पनि पीडीतका आफन्तहरुले निकै हो हल्ला गरेको थियो ।
तरपछि उपचार खर्च मिनाहा र करीब तीन लाख रुपैया क्षतिपुर्ति दिने सहमतिमा अस्पतालका सञ्चालक डा. भगवान सहनीले घटनालाई ढाकछोप गरेका थिए । सो अघि धनुषाको नगराइन नगरपालिका २ बस्ने विजय मण्डलकी २५ वर्षीया पत्नी रोशनी मण्डलले जन्माएकी बच्चाको पनि मृत्यु भएको थियो ।
त्यसमा पनि क्षतिपूर्ति र सम्बन्धित निकायलाई घुस खुवाएर उम्किन सफल भएका थिए । अवैध रुपमा सञ्चालित सो अस्पतालले यसरी प्रत्येक पटकको घटनामा पिडीत परिवारलाई क्षतिपूर्ति र सम्बन्धित निकायलाई घुस खुवाएर घटनालाई ढाकछोप गर्दै आफ्नो पेशालाई निरन्तरता दिदै आएका छन ।
अवैध आफू मात्र होइन, सबैलाई कारवाही होस
यता, अस्पतालका व्यवस्थापक (मैनेजर) विकास कुमार सिंहले सो नवजात शिशुको उपचारमा अस्पतालले कुनै लापरबाही नगरेको दाबी गरेका छन । उनले भने, ‘बच्चाको स्वास्थ्य अवस्था बिग्रिएपछि आफू कहाँ भेन्टिलेटरको सुविधा नभएको कारण रामजानकीमा पठाएको त्यहाँ बाच्न सकेन भने मेरो के गलती ।
अवैध रुपमा अस्पतालमा सञ्चालन गर्नु कतिको उचित हो भन्ने प्रसंगमा सिंहले सो अस्पताल बिना दर्ताको अवैध रहेको स्वीकार गरी ढांट्दै भने जनकपुरमा यो अस्पताल मात्रै होइन ९० प्रतिशतभन्दा बढी अवैध छन सम्बन्धित निकायले कारवाही गर्छ भने सबैलाई गरोस, सबै अस्पताल बन्द हुन्छ भने आफूपनि बन्द गर्छु ।
बिना कुनै मापदण्ड पुरा र दर्ता बिना अस्पताल सञ्चालन गरेर बिरामीको ज्यान लिनु कानून अपराध रहेको जिज्ञासामा अस्पतालतका सञ्चालक डा. सहनीले भने बिरामीलाई बचाउने भन्दा पनि उपचार गर्ने हाम्रो जिम्मेवारी हो, बिरामी बच्दैन भने हामी के गर्ने । जहाँसम्म दर्ताको कुरा प्रक्रियाका अघि बढाइसकेका छौं, नगरपालिकामा फाइल पठाएको छौं अहिलेसम्म दर्ता गरेको छैन मेरो के गलती ।
उपमहानगरपालिकाको लापरवाही
स्वास्थ्य सेवा प्रदान गर्र्न निजी अस्पताललाई कम्पनी रजिष्टारको कार्यालय र स्थानीय तह वा सम्बन्धित निकायमा दर्ता भई अनुमति लिएर मात्र संचालन गर्न पाउने प्रचलित कानूनमा व्यवस्था छ । तर सो अस्पतालले कम्पनी रजिष्टारको कार्यालयमा दर्ता भएपनि २५ बेड भएको कारण स्थानीय तहमा दर्ता अहिलेसम्म दर्ता रहेको छैन ।
यसमा अस्पताल भन्दा पनि जनकपुरधाम उपमहानगरपालिकाको गम्भीर लापरवाही रहेको छ । उपमहानगरपालिकाले अहिलेसम्म स्वास्थ्य सेवा सञ्चालन, व्यवस्थापन तथा अनुगमन सम्बन्धि कार्यविधि समेत तयार पार्न सकेको छैन, उपमहानगरभित्र कतिको अस्पताल छ भन्ने अहिलेसम्म न त कुनै अभिलेख राखेको छ न अनुगमन नै गरेको छ । उपमहानगरपालिकाको लापरवाहीका कारण जनकपुरधाम भित्र एक दर्जनभन्दा बढी निजी अस्पताल अवैध रुपमा संचालमा छन ।
हस्पीटलको अवस्था
जनकपुरधाम उपमहानगरपालिका वडा नम्बर–८ रामानन्द चौकमा डा.भगवान सहनी र डा.गंगाप्रसाद यादवले सञ्चालन गरेको तराई राजधानी हस्पिटलले मात्र २२ शैयामा संचालनमा छन । त्यसमा न त पार्किंग, कुरुवा बस्ने, आईसीयू÷एनआईसीयू लगायतका कुनैपनि मापदण्ड पुरा गरेको छैन ।
सो अस्पतालमा न त आफ्नो प्याथलोजी ल्याब छ, न एक्सरे वा सिटी स्कायन लगायतका व्यवस्था, न अपाङ्ग मैत्री, दलालको भरमा डेढ वर्षदेखि संचालकले अवैध रुपमा संचालनमा गर्दै आएका छन । आधा दर्जनभन्दा बढी उजुरी जिल्ला प्रहरी कार्यालय, उपमहानगरपालिकाको कार्यालय र प्रदेशका स्वास्थ्य महाशाखामा उजुरी परेपनि कुनै चासो लिइएको छैन ।
अस्पताल प्रवेश गर्ने मुख्यद्वारको बोर्डमा भने कम्पनी रजिष्ट्रारको दर्ता नम्बर नलेखि त्यसलाई दर्ता नम्बर भनेर उल्लेख गर्दै बिरामी ठग्दै आएको पाइएको छ । यस अस्पतालले २०७७ असोज ११ गते कम्पनी रजिष्ट्रारको कार्यालयमा दर्ता गराई त्यसको दर्ता नम्बर २४३१५५ पाएको छ । तर, बोर्डमा भने कम्पनी रजिष्ट्रारको दर्ता नम्बरलाई बिरामी झुक्याउन दर्ता नम्बर भन्दै उल्लेख गरिएको छ ।
यो विषयमा आफ्नो प्रतिक्रिया दिनुहोस् !