जनकपुरधाम । जनकपुरधामस्थित वैष्णवी बचत तथा ऋण सहकारी संस्थाले आफ्नो ११ औं वार्षिक साधारण सभा सम्पन्न गरेको छ ।
प्रदेश सभा सदस्य रामआशिष यादवको प्रमुख आतिथ्यमा शनिवार सम्पन्न साधारण सभामा संस्थाका कार्यकारी प्रमुख अधिकृत जयनाथ मण्डलले आर्थिक प्रतिवेदन प्रस्तुत गरेका थिए ।
सो प्रतिवेदनमा २०६७ सालमा दर्ता भई २५ हजार पूँजीबाट शुरु भएको सो संस्थाले १० वर्षको अवधिमा आर्थिक वर्ष २०७७÷०७८ सम्म २२ करोडभन्दा बढीको कारोबारमा पुगिसकेको छ ।
संस्थाले आ.ब.२०७८/०७९ को अनुमानित वार्षिक बजेट ४७ करोड बढी पुर्याउने लक्ष्य लिएका छन् । अहिले सो संस्थामा ऋणी सदस्य संख्या १ हजार ५ सय ४३ र बचतकर्ताको संख्या ५ हजार ५ सय ८५ पुगेको छ । जनकपुरधामको भानु चौकमा प्रधान कार्यालय सहित जिल्लामा धनुषाको विदेह नगरपालिका वडा नं. ६ र धनुषाधाम नगरपालिका वडा नं.३ तिनकौरिया सहित तीनवटा शाखा संचालनमा रहेको छ ।
संस्थाका कार्यवाहक अध्यक्ष महेश्वर यादवको अध्यक्षतामा सो साधारण सभामा प्रमुख अतिथि रामआशिष यादवले न्यून र मध्यम वर्गका परिवारको आर्थिक बचतका लागि सहकारी संस्था प्रमुख रहेकोले यसमा सबैको सम्मान सहभागिता सहकार्य रहेको बताए । सहकारीलाई बढावा दिन सहकारी ऐन तयार भइसकेकोले यसलाई कार्यान्वयनमा ल्याउन आफू प्रदेश सरकारसँग आग्रह गर्ने बताउंदै उनले सहकारी बलियो भएमा यहाँका सामाज बलियो हुने दाबी गरे ।
कार्यक्रममा संस्थाका प्रमुख अधिकृत जयनाथ मण्डलले गरीब विपन्न र मध्यम वर्गसहित लघु उद्यमी सदस्यहरुलाई संस्थामा आबद्ध गराई उनीहरुको आर्थिक, सामाजिक विकासमा निरन्तर सहयोग गर्दै आएको बताए ।
उनले गरीब, दलित, जनजाति, महिला साना किसान घरपरिवारलाई संगठित गरी आय स्रोत र रोजगारीको अवसर प्रदान गर्ने लक्ष्यका साथ संस्था एक दशकदेखि अगाडि बढदै गएको र आगामी दिनमा यसलाई निरन्तरता दिने प्रतिबद्धता जनाए । सो कार्यक्रममा छात्र÷छात्राहरुलाई र उत्कृष्ट बचतकर्ता तथा ऋण सदस्यहरुलाई प्रशंसापत्रले सम्मान सहित पुरस्कृत गरिएको थियो ।
यो विषयमा आफ्नो प्रतिक्रिया दिनुहोस् !