जनकपुरधाम । एकलाैटी रूपमा पदाधिकारी चयन गरिएकाे भन्दै लोकतान्त्रिक समाजवादी पार्टी भित्र विद्रोह शुरु भएको छ ।
पार्टीले गरेको जिल्ला तथा प्रदेशको पदाधिकारी चयनको विरोध गर्दै लोसपाका नेता तथा कार्यकर्ताहरु विद्रोहमा उत्रेका हुन ।
उनीहरुले जनकपुरधाममा एक संयुक्त बैठक गरी सामूहिक निर्णयहरुमा सामूहिक प्रतिबद्धतालाई अघि बढाउने प्रक्रियालाई लत्यांदै मनपरी गरी एकलौटी रुपमा जिल्ला तथा प्रदेश पदाधिकारी चयन गरिएको भन्दै त्यसलाई सच्याउन मांग गरेको छन ।
धनुषा जिल्ला अध्यक्षमा परमेश्वर साह र प्रदेश २ अध्यक्षमा जितेन्द्र सोनललाई चयन गरिएकोमा एउटै व्यक्तिलाई दोहरयाई तेहरयाई जिम्मेवारी दिएर पार्टीको एक व्यक्ति एक पद अवधारणालाई पार्टी नेतृत्वकर्ताले लत्याएर एकलौटी गरेको भन्ने आरोप बैठकमा लगाइएको छ ।
एउटै व्यक्तिलाई पटक पटक अवसर दिनु नेतृत्व वर्गको निर्णयले नयाँ पार्टीमा काल पलाएको सन्देश रहेको ठहर गर्दै प्रदेश २ अध्यक्षमा सोनल र धनुषा अध्यक्षमा परमेश्वर साहलाई चयन गरिएको निर्णयलाई अस्वीकार गर्दै त्यसलाई रद्द गरी सामूहिक निर्णयबाट पदाधिकारी चयन गर्न मांग बैठकबाट गरिएको छ ।
लोसपा अध्यक्ष महन्थ ठाकुरले गरेको पदाधिकारी चयनको निर्णय नसच्याए आन्दोलनमा उत्रने चेतावनी बैठकमा सहभागी लोसपाका दुई दर्जनभन्दा बढी नेताहरुले दिएका छन ।
असन्तुष्ट नेता रामजी रायले भने पार्टीमा एक व्यक्ति एक पद अवधारणा लागू गर्ने र कुनैपनि संस्थागत सामूहिक निर्णय गर्दा सामूहिक प्रतिबद्धतालाई अवलम्बन गर्ने प्रतिबद्धता गरिएको थियो । तर त्यसलाई लत्यांदै पदमा बसेका एउटै व्यक्तिलाई पटक पटक जिम्मेवारी दिनु लोकतान्त्रिक गलत अभ्यास रहेको छ ।
त्यसैगरी रामप्रसाद गिरीले राजनीतिक ज्येष्टतालाई पाखा लगाउंदै प्रोटोकललाई मिच्दै पद बाँडबाँड गरी पार्टीको लोकतान्त्रिक मूल्य मान्यतालाई पार्टी नेतृत्वकर्ता वर्गले लत्याएको आरोप लगाए ।
त्यस्तै संजय सिंहले हिजोसम्म पार्टीका जिल्ला कोषाध्यक्षमा बसेका नेतालाई प्रदेश सचिव लगायतका पद दिएर विगतमा नेतृत्व निर्वाह गरिसकेकाहरुको योगदानलाई व्यक्तिगत स्वार्थमा आसेपासेलाई ग्राहयता दिनु गलत परिपार्टी रहेको आरोप लगाए ।
उमेश मण्डलले नेताहरुको दोहोरो चरित्रका कारण पार्टी धरासायी भएको आरोप लगाउदै नेतामुखी पार्टीले कार्यकर्ता र जनताका समस्यालाई बेवास्ता गर्ने र अन्ततः पार्टी संकटमा पर्ने बताएका छन् ।
उनीहरुले भने पार्टी नेतृत्व वर्गले आफ्नो निर्णय सच्याएर सामूहिक निर्णयबाट राजनीतिक लगानी, प्रोटोकल र विगतका योगदानको कदर गरी पदीय जिम्मेवारी नदिइए आन्दोलनमा उत्रने चेतावनी दिएका छन । साभार : इकागज
यो विषयमा आफ्नो प्रतिक्रिया दिनुहोस् !